Հայաստանը դիտարկում է Երկրի հեռահար զոնդավորման նոր արբանյակներ ձեռք բերելու հնարավորությունը

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին 

Հայաստանի Հանրապետության կառավարության կողմից ձեռք բերված «Armsat-1» արբանյակն իր առաքելությունն ավարտել է 2025 թվականի վերջին ամիսներին: Այս կապակցությամբ իշխանություններն արդեն հայտարարել են նոր արբանյակ կամ արբանյակների խումբ ձեռք բերելու հնարավորությունը դիտարկելու մտադրության մասին, որոնք նախատեսված կլինեն Երկրի հեռահար զոնդավորման և տիեզերական լուսանկարահանման համար: Այս մասին այսօր՝ փետրվարի 16-ին կայացած մամուլի ասուլիսի ժամանակ հայտարարել է Բարձր տեխնոլոգիական արդյունաբերության նախարար Մխիթար Հայրապետյանը:

Նրա խոսքով՝ կառավարությունը լրջորեն քննարկում է երկրի արբանյակային հնարավորությունների ընդլայնման տարբերակները, սակայն ընդգծում է սկզբունքային տարբերությունը արբանյակների տարբեր տիպերի միջև:

Այս համատեքստում նա անդրադարձել է «HayaSat-2» նախագծին՝ շեշտելով, որ նմանատիպ նախաձեռնությունները Հայաստանի համար բացառիկ արժեք ունեն նախևառաջ գիտության, հետազոտությունների և նորարարությունների տեսանկյունից, քանի որ թույլ են տալիս երկրի ներսում ձևավորել սեփական կարողությունները, գիտելիքները և ինժեներական փորձը՝ արբանյակների նախագծման և արտադրության ոլորտում:

Միևնույն ժամանակ, նախարարը նշել է, որ ֆունկցիոնալ տեսանկյունից նմանատիպ գիտահետազոտական արբանյակները և Երկրի հեռահար դիտարկման արբանյակները լուծում են լիովին տարբեր խնդիրներ: Ավելի հավակնոտ կիրառական նպատակների իրականացման համար ոլորտը դեռ պետք է զարգացման երկար ճանապարհ անցնի՝ մեծացնելով տեխնոլոգիական և արտադրական ներուժը:

Հայրապետյանն ընդգծել է, որ այս աշխատանքների շրջանակում կառավարությունը և Բարձր տեխնոլոգիական արդյունաբերության նախարարությունը պատրաստակամություն են հայտնել աջակցել տիեզերական տեխնոլոգիաների զարգացման մեջ ներգրավված գործընկերների և նախաձեռնությունների լայն շրջանակին: Ընդ որում, խոսքը ոչ միայն կոնկրետ նախագծերի, այլև ողջ ոլորտի համար բարենպաստ ինստիտուցիոնալ և տնտեսական միջավայրի ձևավորման մասին է:

Նախարարը հիշեցրել է, որ ավելի վաղ կառավարությունը ներկայացրել էր հարկային արտոնությունների մասշտաբային փաթեթ՝ ուղղված ողջ տնտեսությանը և գիտահետազոտական հատվածին: Այս ծրագրի հիմնական պոտենցիալ շահառուներից մեկը կարող են դառնալ այն գիտահետազոտական խմբերը, որոնք ներգրավված կլինեն, մասնավորապես, հաջորդ հայկական արբանյակի նախագծման և արտադրության մեջ:

Նրա խոսքով՝ համապատասխան օրենքն ընդունելիս իշխանություններն ընդգծել են դրա հիմնարար և հորիզոնական նշանակությունը՝ ելնելով այն գիտակցումից, որ գիտահետազոտական և փորձակոնստրուկտորական աշխատանքներում ներդրումները պետք է խթանվեն պետության կողմից տնտեսության բոլոր ոլորտներում՝ առանց բացառության: Հենց այդ պատճառով ծրագիրն ընդգրկում է ոլորտների ողջ սպեկտրը և որևէ սեկտոր չի առանձնացնում որպես առանձին կատեգորիա:

Այս համատեքստում նախարարը նշել է, որ արբանյակների ստեղծման աշխատանքները կրում են զուտ գիտահետազոտական բնույթ և կորակվեն որպես R&D, ինչը թույլ է տալիս նման նախագծերին հավակնել պետական աջակցության գործող և պլանավորված ծրագրերին մասնակցությանը: Ըստ Հայրապետյանի՝ արդեն իսկ գոյություն ունեն բավարար քանակությամբ պետական օժանդակության գործիքներ և մեխանիզմներ, որոնցից գործընկերները կարող են օգտվել նմանատիպ նախաձեռնությունների զարգացման ժամանակ:

Հետևեք մեզ՝ այստեղ