Թրամփը ծաղրել է Փաշինյանին ու Ալիևին

Վաշինգտոնում երեկ կայացել է «Խաղաղության խորհրդի» առաջին նիստը՝ Դոնալդ Թրամփի նախագահությամբ։ Միացյալ Նահանգներ են մեկնել նաև Հայաստանի և Ադրբեջանի ղեկավարները, որոնց ԱՄՆ նախագահը հատուկ է անդրադարձել՝ հընթացս էլ ծաղրել՝ հարկադրելով ոտքի կանգնել ու ձեռք սեղմել։

«Այս երկուսը հեչ էլ բարի պտուղ չէին։ Կարծում եք՝ հե՞շտ էր։ Չէ, հեշտ չէր։ Նրանք երկուսն էլ դժվար մարդիկ էին, լավ մարդիկ են, բայց դժվար։ Երբ Օվալաձև գրասենյակում էին, ամեն մեկը սենյակի հակառակ ծայրում էր։ Ես ասացի՝ տղաներ, մի քիչ մոտ եկեք, այնքան էլ լավ չէին զգում իրենց, դե գիտեք՝ իրար սպանել են մի 30 տարի։ Մեկ ժամ հետո արդեն կողք կողքի էին կանգնած, գրկեցին իրար, փաստաթուղթ ստորագրեցին։ Եվ հիմա խաղաղություն ունենք այս երկու կարևոր երկրների միջև։ Ես երբեք չեմ մոռանա դա։ Կարող եք հպարտանալ ինքներդ ձեզանով։ Դա հրաշալի տեսարան էր։ 32 տարի»,- ասել է Թրամփը։

Օգոստոսի 8-ից հետո Միացյալ Նահանգներն իրեն տերութիրական է զգում Հարավային Կովկասում, Հայաստանի հաշվին առաջ մղում ԱՄՆ շահերը, իսկ երկրների ղեկավարներին պարզապես նվաստացնում։ Նույնիսկ «Հայաստան» և «Ադրբեջան» բառերը Թրամփի կողմից պարբերաբար շփոթելն ինքնին ազդակ է, որ ԱՄՆ-ին ու նրա նախագահին ոչ թե այդ երկրներն ու նրանց ղեկավարներն են հետաքրքրում, այլ բացառապես սեփական շահերը։

Բնական է, որ ոչ Հայաստանը, ոչ էլ Ադրբեջանը չեն կարող հարգանք պահանջել ԱՄՆ նախագահից, քանի որ իրենք են ինքնակամ մտել այդ խաղի մեջ, Վաշինգտոնին տվել բոլոր լծակները։ Վերջինս էլ օգտվում է դրանցից՝ ըստ իր հայեցողության։ Միայն TRIPP նախագծի 74 տոկոսը պահանջելն ու ստանալն ամեն ինչ արժի։

Արթուր Կիրակոսյան