ՏԿԱԻՆ-ի փրկարար ծառայությունն անցած շաբաթ արձագանքել է 288 դեպքի

 ՀՀ տարածքային կառավարման և արտակարգ իրավիճակների նախարարությունում փետրվարի 15-ին կայացել է հերթական ամենշաբաթյա խորհրդակցությունը, որը վարել է նախարար Արմեն Երիցյանը: Ինչպես տեղեկացրին ՀՀ տարածքային կառավարման եւ արտակարգ իրավիճակների նախարարությունից, Փրկարար ծառայության տնօրեն, փ/ծ գեներալ-լեյտենա նտ Սերգեյ Ազարյանը զեկուցել է շաբաթվա ընթացքում գրանցված պատահարների, ձեռնարկած միջոցառումների և ընթացիկ աշխատանքների մասին: Շաբաթվա ընթացքում փրկարար ծառայությունն արձագանքել է 288 դեպքի: ՓԾ տնօրենը հայտնել է, որ Արագածոտնի, Սյունիքի և Գեղարքունիքի մարզերում ծավալված ժամանակավոր հենակետերը հունվարի 15-ից մինչ օրս աշխատում են 24-ժամյա ռեժիմով: Նշված ժամանակահատվածում օգնություն է ցուցաբերվել ձյան մեջ արգելափակված 601 մեքենայի և 1377 քաղաքացու: 

Նախարարի խորհրդական Ա. Հակոբյանը զեկուցել է, որ շարունակվում են աշխատանքները նախարարության թանգարանի ստեղծման ուղղությամբ, որտեղ ներկայացվելու են հրշեջ-փրկարարական խմբերի ստեղծման և փրկարարական գործողությունների մասին պատմող բացառիկ ցուցանմուշներ և արխիվային լուսանկարներ:

«ՍՊԾ» գործակալության պետ Հ. Պետրոսյանը զեկուցել է ընթացիկ աշխատանքների և նախատեսվող միջոցառումների մասին: Գործակալության պետը հաղորդել է, որ շուտով պատրաստ կլինի սեյսմիկ պաշտպանության ծառայության՝ 2016 թվականին նախատեսվող միջոցառումների ծրագիրը:

«Հիդրոօդերևութաբանության և մթնոլորտային երևույթների վրա ակտիվ ներգործության ծառայություն» ՊՈԱԿ-ի տնօրեն Լ. Վարդանյանը խորհրդակցությանն անդրադարձել է ընթացիկ աշխատանքներին, ներկայացրել մոտակա օրերի եղանակի կանխատեսումը: Լ. Վարդանյանի փոխանցմամբ գրանցված բարձր ջերմաստիճանը կպահպանվի, իսկ փետրվարի 17-20-ին փոքր-ինչ կբարձրանա:

«Աղետների ռիսկի նվազեցման ազգային պլատֆորմ» հիմնադրամի տնօրեն Մ. Պողոսյանը զեկուցել է Վայոց ձորի և Գեղարքունիքի մարզերի համայնքների ուժեղացման ծրագրերի աշխատանքների մասին, որոնց ընթացքում աջակցություն է ցուցաբերվում առաջնահերթ լուծում պահանջող խնդիրներին: