Աստղիկ Սաֆարյանը մտածում է ֆոտոմոդելի կարիերա սկսելու մասին

 Life.panorama.am-ը գրում է.

Աստղիկ Սաֆարյանը վերջին օրերին գտնվում է Բարսելոնայում: Երգչուհին Life.panorama.am-ին պատմել է, որ Բարսելոնա է մեկնել հատուկ նպատակով.

«Այժմ Բարսելոնայում եմ, քանի որ տեղի ոճաբաններից մի քանիսի հետ աշխատում ենք իմ ապրանքանիշի գլխարկների նոր հավաքածուի վրա եւ մոտ օրերս դրանց մի մասն արդեն հասանելի կլինեն Երեւանում, իսկ մյուս մասը կներկայացնենք գարնանային հավաքածուի ժամանակ: Իհարկե, անելիքները դեռ ավարտված չեն, մի շարք գործեր կան այս առումով, որոնք պետք է իրականացնել, ծրագրերում կան նաեւ մի շարք նոր համագործակցություններ իսպանացի լուսանկարիչների հետ. նրանց հետ կհամագործակցեմ որպես ֆոտոմոդել»,- պատմեց Աստղիկ Սաֆարյանը:

Մշտապես իր յուրահատուկ ոճով աչքի ընկնող երգչուհին այս պահին մտածում է նոր՝ ֆոտոմոդելի, կարիերայի մասին. «Արդեն մի քանի համագործակցություններ ունեմ իսպանացի լուսանկարիչների հետ, որոնց հետ աշխատել եմ որպես ֆոտոմոդել: Դրանք դեռ շարունակական բնույթ կկրեն, քանի որ դեռեւս շարունակում եմ նոր համագործակցությունների առաջարկներ ստանալ: Ինձ դուր է գալիս ֆոտոմոդելի աշխատանքը, ես այն իրականացնում եմ մեծ սիրով ու մեծ պատասխանատվությամբ»,- նկատեց երգչուհին:

Նրա խոսքերով՝ նորաձեւությամբ եւ ֆոտոմոդելի կարիերայով հետաքրքրված լինելը երգարվեստը երկրորդ պլան չի մղի. «Իմ «Նա» եւ «Better Way» տեսահոլովակների ռեժիսորների կողմից արդեն կան կրկին համագործակցելու առաջարկներ, թեպետ ինքս պլանավորել էի դարձյալ Երեւանում նկարահանել հաջորդ տեսահոլովակս: Բայց առաջին հերթին պետք է ընտրեմ երգը, որի վրա կնկարահանեմ հերթական տեսահոլովակը, հենց այդ ժամանակ էլ ավելի հասկանալի կլինի, թե ո՞ր երկրում եւ ո՞ր ռեժիսորի հետ կաշխատեմ»,- նշեց երգչուհին ու շեշտեց, որ նպատակները շատ են եւ նա բծախնդրորեն դրանց իրականացման շուրջ է աշխատում:

 

Հեղինակ՝ Անուշիկ Մելքոնյան