ՀՀԿ-ՀՅԴ բանակցությունները դեռ շարունակվում են

ՀՀԿ-ՀՅԴ բանակցությունները դեռ շարունակվում են: Այս մասին «Արմենպրես»-ի մամուլի սրահում հրավիրված ասուլիսին նշեց Ազգային ժողովի Հանրապետական խմբակցության քարտուղար Գագիկ Մելիքյանը: «Բանակցությունների արդյունքի հրապարկման վերջնաժամկետ չի նշվել: Առանձին քաղաքական գործիչներ առանձին խոսակցություններ են տարել, բայց վերջնաժամկետ չի սահմանվել: ՀՀԿ մամուլի խոսնակ Էդուարդ Շարմազանովը հայտարարել է, որ Դաշնակցության հետ համագործակցելու համաձայնություն կա: Առաջիկայում բոլոր այդ գործընթացների մասին առանձին հայտարություն կլինի: Այս պահին կարող եմ ասել, որ բանակցությունները շարունակվում են»,-ասաց Գագիկ Մելիքյանը:

Լրագրողների հարցին, թե ո՞ր հարցերի շուրջ կողմերը չեն կարողանում ընդհանուր եզրահանգման գալ, Գագիկ Մելիքյանը նշեց, որ լրատվական դաշտը շատ է կարևորություն տալիս պորտֆելների բաշխմանը: «Նախ ասեմ, որ այս կամ այն պաշտոնը զբաղեցնելու առումով հստակ անուններ որևէ մեկը չի հնչեցրել, նման որոշում դեռ չկա: Դրանից բացի, պաշտոններն առաջնահերթ չեն: Դրանց առաջնահերթություն մի տվեք, դրանք երկրորդական խնդիրներ են: Ամենակարևորն ապագային միտված ծրագրային դրույթներն են, որոնց պետք է ուղղվի այդ երկու քաղաքական ուժերի համագործակցությունը: Պաշտոններն ու պաշտոնյանները ցանկացած պահի կարող են փոխվել»,-ավելացրեց Հանրապետականն` ընդգծելով, որ ապագայի տեսլականի մասին նախագահ Սերժ Սարգսյանի ելույթին պետք է հետևի Դաշնակցության հետ բանակցելու արագ գործընթացը: