Իրանի շուրջ նոր լարվածություն․ Թրամփը զգուշացնում է պատերազմի ամենավտանգավոր պահի մասին

Պատերազմի ռիսկը ամենաբարձրն էր առաջին երեք օրերին։ Այդ մասին հայտարարել է ԱՄՆ նախագահ Դոնալդ Թրամփը՝ խոսելով Իրանի շուրջ ստեղծված իրավիճակի մասին։ Նրա խոսքով՝ հակամարտությունների սկզբնական փուլն է ամենավտանգավորը, երբ լարվածությունը կարող է արագ վերաճել լայնածավալ պատերազմի։

Իրանի շուրջ իրավիճակը շարունակում է մնալ լարված և բազմաշերտ՝ ներառելով ռազմական, քաղաքական և դիվանագիտական հայտարարություններ տարբեր երկրների առաջնորդների կողմից։ Իսրայելի վարչապետ Բենիամին Նեթանյահուն հայտարարել է, որ Իրանի վրա իրականացված հարվածները արդեն իսկ բարելավել են Իսրայելի միջազգային դիրքը։ Նրա խոսքով՝ այդ գործողությունները ոչ միայն ուժեղացրել են Իսրայելի դիրքերը միջազգային ասպարեզում, այլ նաև կարող են հանգեցնել փոփոխությունների հենց Իրանում։

Միևնույն ժամանակ Իրանի նախագահ Մասուդ Փեզեշքիանը կտրուկ արձագանքել է նման հայտարարություններին՝ ընդգծելով Իրանի պատմական դիմակայությունը արտաքին ճնշումներին։ Նրա խոսքով՝ Իրանի ոչնչացման մասին խոսողները լավ չեն ճանաչում երկրի պատմությունը։

«Քանդողները եկել ու գնացել են, իսկ Իրանը մնացել է կանգուն»,– ասել է Փեզեշքիանը։

Միջազգային դիվանագիտական շփումները նույնպես ակտիվացել են։ Հեռախոսազրույց են ունեցել Վլադիմիր Պուտինը և Մասուդ Փեզեշքիանը, որի ընթացքում Ռուսաստանի նախագահը վերահաստատել է իր դիրքորոշումը՝ հակամարտությունը հնարավորինս արագ կարգավորելու և այն քաղաքական ու դիվանագիտական ճանապարհով լուծելու անհրաժեշտության մասին։

Միաժամանակ, ԱՄՆ-ից հնչող հայտարարությունները ցույց են տալիս կոշտ մոտեցում։ Սպիտակ տան մամուլի խոսնակը հայտարարել է, որ ԱՄՆ ռազմական գործողությունը կավարտվի միայն այն դեպքում, երբ Իրանը անվերապահորեն հանձնվի։ Նրա խոսքով՝ նախագահ Թրամփը չի ակնկալում, որ իրանական իշխանությունները ինքնուրույն կհամաձայնեն հանձնվել, և հենց նախագահն է որոշելու, թե ինչն է համարվում հանձնվել։

Մամուլի խոսնակը նաև չի բացառել Իրանում ցամաքային ռազմական գործողության հնարավորությունը։ Նրա խոսքով՝ ռազմական գործողությունները կավարտվեն այն ժամանակ, երբ ԱՄՆ նախագահը որոշի, որ նպատակները իրականացված են և Իրանը փաստացի հանձնվել է՝ անկախ նրանից՝ պաշտոնապես կհայտարարի դա, թե ոչ։

Ուկրաինայի նախագահ Վլադիմիր Զելենսկին նույնպես անդրադարձել է Իրանի շուրջ զարգացումներին՝ դրանք գնահատելով որպես լուրջ գլոբալ սպառնալիք։ Նրա խոսքով՝ Ռուսաստանի և Իրանի համագործակցությունը, մասնավորապես, անօդաչու թռչող սարքերի արտադրության ոլորտում, կարող է ավելի մեծ ապակայունացման հանգեցնել և նույնիսկ ստեղծել պայմաններ, որոնք կարող են հանգեցնել Երրորդ համաշխարհային պատերազմի։ 

Զելենսկին ընդգծել է, որ աշխարհը նման սցենարի համար դեռ պատրաստ չէ։ Իրանի շուրջ զարգացումները շարունակում են ազդել տարածաշրջանային և միջազգային քաղաքականության վրա՝ ներգրավելով աշխարհի մի շարք խոշոր ուժերի և մեծացնելով լայնածավալ հակամարտության վտանգը։

Ալիտա Եղիազարյան