Ժողովուրդը Եկեղեցու հետ է. ի աջակցություն Սուրբ Էջմիածնի ստորագրահավաքը ռեկորդային կարճ ժամանակում 50000 ստորագրություն հավաքեց. «Փաստ»

«Փաստ» օրաթերթը գրում է.

Հայաստանի ժամանակակից պատմության թերևս ամենադինամիկ հասարակական ակցիաներից մեկը ծավալվեց armspyurk.com հարթակում: Ի աջակցություն Հայ առաքելական եկեղեցու պետիցիան ստորագրողների թիվը հաղթահարեց 50000-ը: Այն փաստը, որ նման թվով ստորագրություններ դրվեցին խիստ կարճ ժամանակի ընթացքում, ակնառու ցույց է տալիս հանրային մոբիլիզացիայի մակարդակն ու Եկեղեցու կարևորությունը՝ որպես առանցքային ազգային ինստիտուտ:

Ստորագրողների թվի շեշտակի աճը բարձրագույն հոգևորականության դեմ կիրառված աննախադեպ միջոցների հանդեպ հանրային ուղիղ արձագանքն է: Հայաստանի նորագույն պատմության մեջ առաջին անգամ ձևավորվեց մի իրավիճակ, երբ Ամենայն հայոց կաթողիկոս Գարեգին Երկրորդի ու Գերագույն հոգևոր խորհրդի մի շարք անդամների տեղաշարժվելու ազատությունը գործնականում սահմանափակվեց:

Իշխանությունների կողմից կիրառված՝ երկրից դուրս գալու արգելանքը հանգեցրեց նրան, որ Վեհափառը չկարողացավ ներկա գտնվել նշանակալի միջեկեղեցական միջոցառումների, ներառյալ՝ Վրաց եկեղեցու կաթողիկոս-պատրիարք Իլիա Երկրորդի հուղարկավորությանը:

Հասարակության մեջ նման գործողություններն ընկալվում են ոչ թե որպես իրավաբանական ընթացակարգ, այլ որպես Մայր Աթոռ Սուրբ Էջմիածինը վարչական և դիվանագիտական մեկուսացման ենթարկելու փորձ: Վեհափառ Հայրապետի միջազգային գործունեության սահմանափակումը շոշափելի հարված է հասցնում Սփյուռքի և քրիստոնեական աշխարհի հետ Հայաստանի կապերին՝ ազգին զրկելով համաշխարհային ասպարեզում իր ամենածանրակշիռ ձայներից մեկից:

ՀԱԵ առաջնորդի տեղաշարժի սահմանափակմանը զուգահեռ՝ իրավապահ մարմինները նաև քրեական հետապնդումների շարք են նախաձեռնել բարձրաստիճան հոգևորականների դեմ: Այդ «գործերով» մեղադրանքներ են ներկայացված Եկեղեցու կառավարման առանցքային գործիչների, որոնք անկասկած հեղինակություն են ընկալվում ժողովրդի կողմից: Նրանց շարքում են Մայր Աթոռի դիվանապետ Արշակ արքեպիսկոպոս Խաչատրյանը, Շիրակի թեմի առաջնորդ Միքայել արքեպիսկոպոս Աջապահյանը, Արագածոտնի թեմի առաջնորդ Մկրտիչ եպիսկոպոս Պռոշյանը, Բագրատ արքեպիսկոպոս Գալստանյանը:

Հանրության առանձնահատուկ ուշադրությունը սևեռվեց այն բանին, որ հարվածի տակ հայտնվեցին ոչ միայն հոգևորականները, այլև նրանց մերձավորները: Կաթողիկոսի եղբոր ու եղբորորդու դեմ քրեական հետապնդումը, հոգևորականության այլ ներկայացուցիչների ընտանիքների անդամների դեմ քննչական գործողությունները շատերը գնահատում են որպես հոգեբանական և քաղաքական ճնշման միջոց: Իրավիճակը, երբ Եկեղեցու բարձրագույն ներկայացուցիչներն ու նրանց ազգականները դատական հետապնդման թիրախ են դառնում, երկրի քաղաքացիների շրջանում նրանց հետ համերաշխության հզոր ալիք առաջացրեց:

Ավելին, Եկեղեցուն աջակցելու համար կալանավորվեց բարերար և գործարար Սամվել Կարապետյանը, որը մի քանի ամիս անցկացրեց բանտում, իսկ հիմա գտնվում է տնային կալանքի տակ:

Հիսուն հազար մարդ, որ իրենց ստորագրություններն են դրել armspyurk.com հարթակում զետեղված պետիցիայի ներքո, ներկայացնում են հասարակության ամենատարբեր շերտերը: Ստորագրահավաքի արագությունը ցույց է տալիս, որ Եկեղեցին ու բարձրաստիճան հոգևորականների վարկաբեկելու փորձերը հակառակ արդյունքի հանգեցրին. տարանջատվելու և պառակտվելու փոխարեն, ժողովուրդը միասնական ճակատով հանդես գալու պատրաստականություն դրսևորեց: Ստորագրահավաքի մասնակիցների մեծամասնության համար այսօր Եկեղեցու պաշտպանությունը սեփական պատմության իրավունքի և դարերով անսասան մնացած արժեքների պաշտպանությունն է:

Իրավիճակում, երբ պետական կառույցները ենթարկվում են քննադատության՝ ազգային անվտանգության հարցերում անարդյունավետության համար, Եկեղեցին գործնականում մնում է վերջին անկախ հենասյունը, որն ի վիճակի է միավորել համայն աշխարհի հայությանը: Հենց դրանով է բացատրվում այն, թե ինչու են Էջմիածնի վրա տեղեկատվական գրոհներն ու հոգևորականների կալանավորումները նման արագ ու զանգվածային հակադարձման արժանանում:

Հայ առաքելական սուրբ եկեղեցու շուրջ վերջին շաբաթների իրադարձությունները պատմական կարևոր նախադեպ են ստեղծում: Armspyurk.com հարթակում ստորագրահավաքի բացառիկ արագությունը հաստատում է, որ հայ հասարակությունը հակված չէ անհաղորդ դիտորդի դիրքում մնալ իր հոգևոր առաջնորդների հետապնդումների դեպքում: Այս ցանկում ամեն մի նոր ստորագրություն վկայությունն է այն բանի, որ Եկեղեցու ազդեցության սահմանափակման կամ Եկեղեցու արքեպիսկոպոսների դիրքորոշումը քրեական գործերով ճնշելու փորձերը միայն ամրապնդում են հավատացյալ ժողովրդի ու Մայր Աթոռ Սուրբ Էջմիածնի կապը:

Ստորագրահավաքը շարունակվում է, և դրա մասշտաբների հետ արդեն անհնար է հաշվի չնստել ինչպես երկրի ներսում, այնպես էլ նրա սահմաններից դուրս:

Մանրամասները՝ «Փաստ» օրաթերթի այսօրվա համարում