Համընդհանուր ապահովագրություն 2026․ ո՞րքան է վճարում բուժառուն

Մեզ մշտապես ցույց են տալիս դեպքեր, երբ ապահովագրությունը ծածկել է թանկարժեք վիրահատությունների ծախսերը՝ ստենտավորում, սրտի խթանիչի տեղադրում, կատարակտի բուժում և այլն։

Սակայն առողջապահությունը սոսկ միանգամյա, թանկ վիրահատությունները չեն։ Այն նաև ներառում է վիրաբուժական միջամտություն չպահանջող տարբեր (այդ թվում՝ խրոնիկական) հիվանդություններ ունեցող մարդկանց բուժումն ու հսկողությունը։ Եվ այստեղ է հետաքրքիր տեսնել, թե որքան է նման բուժառուն վճարում իր գրպանից՝ ապահովագրությունից զատ։

Բաց թողնելով այն մասը, որը վերաբերում է նախ ընտանեկան բժշկի, ապա նեղ մասնագետի մոտ անվերջ հերթերին, երկրորդ փորձից մի կերպ անալիզներ հանձնելուն և երեք շաբաթ անց վերջապես արդյունքները ստանալուն, ուղեգրով ախտորոշիչ հետազոտությանը մեկ ամիս սպասելուն, դեղատոմսով դեղեր ստանալու համար դեղատնից դեղատուն ընկնելու «քվեստին», կներկայացնենք միայն չոր թվերը։

Մեկ դեպքի օրինակով կհաշվարկենք, թե որքան գումար է փոխհատուցել համընդհանուր ապահովագրությունը, և որքան է մարդը վճարել իր գրպանից։

Դեպքի հաշվարկը՝ քայլ առ քայլ

Ըստ Armed հավելվածում առկա տվյալների՝ պոլիկլինիկայում տեղի է ունեցել թերապևտի մեկ խորհրդատվություն, որի ընթացքում նշանակվել է դեղորայք՝ ֆոլաթթու և B12, ինչպես նաև ստացվել է նյարդաբանի ուղեգիր։

250–300 դրամ արժողությամբ ֆոլաթթուն ուղեգրով ստանալու համար բուժառուն այցելել է յոթ կամ ութ դեղատուն և վերջիվերջո գնել է այն իր գումարով։ B12-ի համար նա վճարել է մոտավորապես 500 դրամ։ Ընդհանուր՝ 800 դրամ։

Թերապևտի խորհրդատվության արժեքը Armed համակարգում չի արձանագրվել, սակայն ըստ Առողջապահության նախարարության փաստաթղթերի՝ այն գնահատվում է 6000 դրամ։ Նյարդաբանի մոտ երկու այցը գնահատվել է 6000 և 2000 դրամ։

Պոլիկլինիկայի լաբորատորիայում կատարվել է երկու անալիզ՝ C-ռեակտիվ սպիտակուց (1240 դրամ) և ռևմատոիդ գործոն (1100 դրամ)։

Ուղեգրով բժշկական կենտրոններից մեկում կատարվել է ախտորոշիչ հետազոտություն՝ երկու ձեռքի էլեկտրոնեյրոմիոգրաֆիա, որի արժեքը 6500 դրամ է։

Այնուհետև բուժառուին միջին աստիճանի երկկողմանի կարպալ թունելի համախտանիշի բուժում է նշանակվել՝ դեղորայք և ֆիզիոթերապիա (էլեկտրաֆորեզ)։

Ֆիզիոթերապիան համընդհանուր ապահովագրությամբ չի վճարվում, չնայած այս հիվանդության դեպքում այն համարվում է բուժման հիմնական մեթոդը։

Ապահովագրությամբ տրամադրված դեղամիջոցներ

Բուժառուն ապահովագրությամբ ստացել է հետևյալ դեղամիջոցները.

Դիկլոֆենակի ներարկում (10 ամպուլ)՝ 1010 դրամ, գումարած 100 դրամ՝ անվճար կամ զեղչված դեղորայք տրամադրելու համար։ (Ի դեպ, ներարկիչների և նրա մասին, թե ով է իրականացնելու ներարկումները, կարծես, ոչ ոքի մտքով չի էլ անցել, քանի որ ներարկային դեղամիջոցների համար ներարկիչները, ինչպես նաև բուժքրոջ ծառայություններն ապահովագրության մեջ չեն ներառվել)։

Նոլպազա՝ 1460 դրամ, գումարած 100 դրամ։ Իբուպրոֆեն՝ 1980 դրամ, գումարած 100 դրամ։

Գրպանից կատարված վճարումներ

Բուժառուն 10 կուրս ֆիզիոթերապիայի և անհրաժեշտ դեղորայքի՝ հիդրոկորտիզոնի համար վճարել է իր գրպանից՝ համապատասխանաբար 40 000 և 6100 դրամ։

Բուժառուն նաև նյարդաբանի նշանակած մեկ այլ դեղամիջոց՝ նեյրոմիդինը, ձեռք է բերել իր միջոցներով՝ 17 270 դրամով։

Ինչքա՞ն է ծածկել ապահովագրությունը

Ընդհանուր առմամբ ապահովագրությունը ծածկել է 27 590 դրամ բուժման ծախսեր, իսկ բուժառուն սեփական գրպանից վճարել է 64 170 դրամ։

Բուժման ընդհանուր արժեքը կազմել է 91 760 դրամ։ Տոկոսային հարաբերակցությամբ ստացվում է, որ ապահովագրությունը ծածկել է բուժման ամբողջ ծախսի ընդամենը 30%-ը։

Դեռ առողջության համընդհանուր ապահովագրության ծրագրի գործարկման ժամանակ Առողջապահության նախարարության ներկայացուցիչները, ինչպես նաև վարչապետ Նիկոլ Փաշինյանը, նշել են, որ ապահովագրությունը չի կարող ծածկել ամբողջ բուժօգնությունն ու ծառայությունները. այն կծածկի առավել տարածված հիվանդությունների բուժման ծախսերը, որոնց մասնաբաժինը ընդհանուր կառուցվածքի մոտ 30% է։ Սակայն առողջապահության բյուջեի մեծ մասը ծախսվում է հենց այդ հիվանդությունների բուժման համար։

Ըստ երևույթին՝ երկկողմանի կարպալ թունելի համախտանիշը չի ներառվում հիվանդությունների այդ 30%-ի մեջ, սակայն ներառված է մյուս 30%-ի մեջ. ապահովագրությունը ծածկում է այս հիվանդության բուժման ծախսերի միայն 30%-ը։

Ահա այսպիսի թվաբանություն։ Ընդ որում, բուժառուն նպաստային խմբերում չի ներառված և ինքն է վճարում իր ապահովագրության համար։ Այնպես որ այստեղ կարելի էր ավելացնել ևս մեկ հաշվարկ՝ համընդհանուր ապահովագրության հիմնադրամին փոխանցված ապահովագրավճարների որ մասն է ծախսվել հենց նրա բուժման վրա։ Սակայն առայժմ ձեռնպահ կմնանք նման հաշվարկներից, քանի որ ապահովագրությունը մի քիչ այլ կերպ է գործում, և հաշվեկշիռը կարելի է հաշվարկել միայն զգալի ժամանակահատվածից հետո։

Իսկ եթե դրան գումարենք հերթերում սպասելու և տասնյակ դեղատներ այցելելու համար կորցրած ժամանակը (որովհետև մի դեղատանը կարող են տրամադրել դեղատոմսով նշանակված մեկ դեղամիջոցը, իսկ մյուսի համար պետք է գնալ այլ դեղատուն, և դեռ պետք է գտնել այդ դեղատները, քանի որ Armed-ի ցանկում լինելը դեռ ոչինչ չի երաշխավորում), ապա հեշտությամբ կարող ենք հասկանալ բոլոր այն ապահովագրված ՀՀ քաղաքացիներին, որոնք լուռ շարունակում են գնել իրենց սրտի, արյան ճնշման, վահանաձև գեղձի և այլևայլ դեղամիջոցներ՝ միայն թե այդ քաշքշուկի վրա ժամանակ չվատնեն։