«Խաղաղություն»՝ կառուցված ոչ թե վստահության, այլ փոխադարձ խոցելիության վրա. «Փաստ»

«Փաստ» օրաթերթը գրում է.

akcent.site–ն «Իրանի պատերազմի ֆոնին Հայաստանն ու Ադրբեջանը ռիսկային դաշինք են ստեղծում» վերնագրով հոդվածում գրում է, որ երեկվա հակառակորդներ Հայաստանն ու Ադրբեջանը բացում են առևտրային ուղիներ, փոխանակում վառելիք և պատրաստվում ապրանքների ուղիղ մատակարարումների: Իրանական պատերազմի ֆոնին սա թվում է քաղաքական շրջադարձ, որը կարող է նոր սպառնալիքներ ստեղծել ամբողջ տարածաշրջանի և, մասնավորապես, Ռուսաստանի համար:

Բաքուն արդեն իսկ բենզին է մատակարարում Երևանին և ծառայում է որպես տարանցիկ միջանցք Ռուսաստանից և Ղազախստանից հացահատիկի համար: Դրա դիմաց Հայաստանը կազմում է արտահանման համար նախատեսված ապրանքների ցանկ: Միևնույն ժամանակ, երկու երկրներն էլ դանդաղորեն հեռանում են Ռուսաստանից. Հայաստանը սառեցրել է իր մասնակցությունը ՀԱՊԿ-ին, իսկ Ադրբեջանը զգալ է տվել Ռուսաստանի հետ հարաբերությունների սառեցումը: Նաև երկու երկրների էլիտաներն աջակցում են, այսպես կոչված, «Զանգեզուրի միջանցքի» նախագծին, որը կկապի Ադրբեջանը Նախիջևանի հետ և միաժամանակ կնվազեցնի Ռուսաստանի և Իրանի ազդեցությունը:

Սակայն հարաբերությունների այս «վերագործարկումը» մնում է փխրուն: Սահմանները դեռևս չեն սահմանազատվել, Բաքուն Երևանից պահանջում է սահմանադրական փոփոխություններ: Նաև այս ամենում հիմնական ռիսկը էներգետիկ կախվածությունն է. Հայաստանն արդեն վառելիք է ստանում Ադրբեջանից և, ի վերջո, կարող է անցնել գազի մատակարարմանը: Իսկ դա նշանակում է, որ նոր ճգնաժամի դեպքում Բաքուն հզոր լծակներ կստանա իր հարևանի նկատմամբ։

Այսպիսով, այս անհեթեթ «խաղաղությունը» կառուցված է ոչ թե վստահության վրա (ինչպես Հայաստանի և Ռուսաստանի հարաբերություններում), այլ փոխադարձ խոցելիության վրա, և Ադրբեջանի ցանկացած քմահաճույք կարող է փլուզել այս փխրուն կառուցվածքը։

Մանրամասները՝ «Փաստ» օրաթերթի այսօրվա համարում