Մխիթարյանն ավելի համբերատար ու հավասարակշռված է դարձել. Ruhr Nachrichten

 Գերմանական «Ruhr Nachrichten» պարբերականն անդրադարձել է Հայաստանի ազգային հավաքականի և Դորտմունդի «Բորուսիա»-ի կիսապաշտպան Հենրիխ Մխիթարյանի՝ «Հանովեր»-ի դեմ անցկացրած խաղին և ընդհանրապես գերմանական ակումբում նրա դերին ու նշանակությանը:

Ինչպես հաղորդում է «Արմենպրես»-ը, պարբերականն, անդրադարձ կատարելով Բունդեսլիգայի 21-րդ տուրի շրջանակներում կայացած «Բորուսիա»-«Հանովեր» հանդիպման ընթացքում Մխիթարյանի ցուցադրած խաղին գրել է. «Հենրիխ Մխիթարյանն առջևում 50 մետր տարածություն ուներ: Խաղադաշտի կենտրոնում նա Մարկո Ռոյսից ստացավ գնդակը  և առաջ նետվեց: Նա բավականաչափ ժամանակ ուներ գրոհի շարունակությունը որոշելու կամ դանդաղելու համար, սակայն իրավիճակները, երբ հայ կիսապաշտպանի ոտքերը ողում էին, վաղուց անցյալում են: Հենրիխ Մխիթարյանը հանդիպման 57-րդ րոպեին 20 մետրից գրավեց Ցիլերի դարպասի ներքևի աջ անկյունը և  նվազագույն 1:0 հաշվով հաղթանակ պարգևեց «Բորուսիա»-ին: Նման փոքրիկ, կարճ խաղային դրվագները մեծ նշանակություն են ստանում: Մխիթարյանի այս գոլը ստեղծագործող  ֆուտբոլիստի զարգացման համար նոր առաջընթաց քայլ էր:

Պարբերականը հավելում է, որ այդ խաղում Մխիթարյանի մոտ ամեն ինչ չէ, որ ստացվում էր, սակայն նա սպասում էր իր հնարավորությանը: «Նախկինում նման դիրքերում ֆուտբոլիստը երկմտում էր կամ ավելի անհարմար դիրքերից հարվածներ էր կատարում, սակայն հիմա նա համբերատար է դարձել»,- գրում է գերմանական պարբերականը:

Դորտմունդի «Բորուսիա»-ն ընթացիկ մրցաշրջանում անցկացրած 33 պաշտոնական խաղերում 38 գոլ է խփել Հենրիխ Մխիթարյանի մասնակցությամբ: Պարբերականը նկատում է, որ Հենրիխն ավելի հավասարակշռված խաղ է ցուցադրում, քանի որ միշտ չէ, որ հնարավոր է արդյունավետ խաղ ցուցադրել, հատկապես թիմերի դեմ, երբ բոլոր 11 ֆուտբոլիսները մտածում են միայն հակառակորդի վտանգավոր գրոհները չեզոքացնելու մասին: Մխիթարյանն ինքն է ասում, որ հարկավոր է պատրաստ լինել նաև նման իրավիճակների: