«Բարսելոնայի» պաշտպան Ժերար Մարտինը կկարողանա մասնակցել «Ատլետիկոյի» դեմ խաղին

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին 

Վաղը՝ ապրիլի 14-ին, կատալոնական «Բարսելոնան» Չեմպիոնների լիգայի խաղարկության քառորդ եզրափակիչի պատասխան հանդիպման շրջանակներում արտագնա խաղում ուժերը կչափի Մադրիդի «Ատլետիկոյի» հետ։ Հիշեցնենք, որ նախորդ չորեքշաբթի կայացած առաջին խաղում կատալոնացիները սեփական հարկի տակ 0-2 հաշվով պարտություն էին կրել։

Ինչպես հաղորդում է իսպանացի հայտնի ինսայդեր Խավի Միգելը, ամեն ինչ վկայում է այն մասին, որ «Բարսելոնայի» 24-ամյա պաշտպան Ժերար Մարտինը կկարողանա մասնակցել մադրիդյան թիմի դեմ սպասվող բարդագույն դիմակայությանը։ Ըստ աղբյուրի՝ գլխավոր մարզիչ Հանս-Դիտեր Ֆլիկը ծրագրում է պաշտպանության կենտրոնում հենց նրան վստահել մեկնարկային կազմի տեղը՝ խաղադաշտ դուրս բերելով Էրիկ Գարսիայի հետ զույգով։

Նշենք, որ Իսպանիայի Լա լիգայի նախորդ տուրում՝ «Էսպանյոլի» դեմ խաղում (4-1), Ժերար Մարտինը վնասվածքի պատճառով փոխարինվել էր առաջին խաղակեսից հետո։ Այնուամենայնիվ, նրա ապաքինումը թույլ կտա որոշակիորեն լուծել պաշտպանության կենտրոնում ստեղծված բարդ իրավիճակը, քանի որ «կապտանռնագույնների» առանցքային կենտրոնական պաշտպան Պաու Կուբարսին որակազրկման պատճառով բաց է թողնելու այս հանդիպումը (հիշեցնենք, որ նա կարմիր քարտ էր ստացել թիմերի միջև կայացած առաջին խաղում):

Չեմպիոնների լիգայի քառորդ եզրափակիչի «Ատլետիկո Մադրիդ» — «Բարսելոնա» պատասխան հանդիպումը կմեկնարկի Երևանի ժամանակով 23:00-ին:

Հետևեք մեզ՝ այստեղ