Թուրքիայի Սահմանադրական հանձնաժողովը լուծարվել է

Թուրքիայի քեմալական Հանրապետական ժողովրդական կուսակցությունը (ՀԺԿ) հայտարարել է Սահմանադրական հանձնաժողովից դուրս գալու մասին: Երկրում նոր սահմանադրության մշակման նպատակով ստեղծված թուրքական խորհրդարանական կոմիտեն լուծարվել է: Այս մասին տեղեկացնում է թուրքական «Անադոլու» գործակալությունը:

Սահմանադրական հաննձաժողովի անդամ, քեմալական կուսակցությունից ընտրված պատգամավոր Բյուլենթ Թեզջանը հայտարարել է, որ իրենք հանձնաժողովից դուրս գալու որոշում են կայացրել առաջնահերթ լուծում պահանջող խնդիրների հարցում համաձայնություն չունենալու հետևանքով:

Թուրքիայի Ժողովուրդների դեմոկրատական կուսակցության անդամ, հայ պատգամավոր Գարո Փայլանը հայտնել է, որ հանձնաժողովի ներսում երեք ընդդիմադիր կուսակցությունները պաշտպանել են երկրի կառավարաման խորհրդարանական համակարգը, մինչդեռ իշխող «Արդարություն և զարգացում» կուսակցությունը ցանկանում է անցում կատարել նախագահական կառավարման մոդելին: «Հանձնաժողովը կազմալուծվեց, երբ ՀԺԿ-ն ասաց, որ կքննարկի միայն խորհրդարանական համակարգին առնչվող հարցեր»,- հայտնել է Փայլանը:

Թուրքիայի մեջլիսի խոսնակ Իսմայիլ Քահրամանը հայտարարել է, որ հանձնաժողովի ներսում անհամաձայնության պատճառով որոշում է կայացվել, որ հանձնաժողովը կդադարեցնի իր աշխատանքը:

Իշխող «Արդարություն և զարգացում» կուսակցության փոխնախագահ Օմեր Չելիքը մեղադրել է հիմնական ընդդիմադիր Հանրապետական ժողովրդական կուսակցությանը նոր սահմանադրության ստեղծման գործընթացը սաբոտաժի ենթարկելու մեջ: «Եթե լինենք անկեղծ, ապա ՀԺԿ-ն չէր ցանկանում նոր սահմանադրություն ստեղծել: Մենք ցանկանում էինք ստեղծել նոր Թուրքիայի առաջին սահմանադրությունը, սակայն նրանք պնդեցին հին Թուրքիայի սահամանդրության վրա»,- ասել է Չելիքը:

Թուրքիայի սահմանադրական հանձնաժողովը բաղկացած էր 12 պատգամավորներից՝ երեքական անդամ մեջլիս անցած յուրաքանչյուր կուսակցությունից: Հանձնաժողովն առաջին հանդիպումն ունեցել էր փետրվարի 3-ին՝ քննարկելու 1982 թվականին զինուժի կողմից գրված սահմանադրությունը փոխելու հարցը: