«Վելես». Քննչական կոմիտեն չարաշահում է իր լիազորությունները

«Վելես» իրավապաշտպան կազմակերպությունը բաց նամակ է հղել ՀՀ Մարդու իրավունքների պաշտպանի գրասենյակին, ՄԱԿ-ի երեւանյան գրասենյակին, Հայաստանում ԵՄ պատվիրակությանը, Եվրոպայի խորհրդի երեւանյան գրասենյակին, ԵԱՀԿ երևանյան գրասենյակին, ՀՀ տարածքում գործող տեղական եւ միջազգային իրավապաշտպան կազմակերպություններին, ՀՀ-ում գործող դեսպանատներին՝ հայտնելով, որ ՀՀ Քննչական կոմիտեն չարաշահում է իր լիազորությունները: Խոսքը կոմիտեի մի շարք աշխատակիցների պաշտոնական լիազորությունների չարաշահումների մասին է, ովքեր, ըստ կազմակերպության, բացառիկ հովանավորչություն են դրսեւորում ՀՀ նախկին պետական պաշտոնյաների նկատմամբ՝ նրանց անօրինական գործողություններն օրինականացնելու եւ վերջիններիս գործողություններից տուժած, ունեզրկված քաղաքացիների իրավունքների եւ շահերի ոտնահարման ուղղությամբ:

Մասնավորապես, խոսքը վերաբերում է ՀՀ Քաղաքացիական ավիացիայի նախկին պետ Հովհաննես Երիցյանին, որը, ըստ «Վելես»-ին դիմած մի քանի ընտանիքների, տարիներ ի վեր զբաղվում է վաշխառությամբ եւ բարձր տոկոսադրույքներով՝ անհայտ ճանապարհով ձեռք բերված գումարներ տրամադրելով, ինչպես նաև փաստաթղթային կեղծիքներով տիրացել է մի շարք ՀՀ քաղաքացիների սեփականությանը:

Ըստ կազմակերպության տարածած հաղորդագրության ՝ ՀՀ Քննչական կոմիտեն, հանձինս իր աշխատակիցների, ճնշումներ և սպառնալիքներ է գործադրում այն անձանց նկատմամբ, ովքեր բարձրաձայնում և վերոհիշյալ նախկին պաշտոնյային պատասխանատվության կանչելու պահանջ են ներկայացնում: Այսպես՝ Հ. Երիցյանի եւ նրա գործընկերներ Վ. Վարդանյանի և Ա. Այվազյանի կողմից վաշխառությամբ և խարդախությամբ Գ. Թումասյանի, Զ. Մելիքյանի, Զ. Գյոզալյանի, Ռ. Պետրոսյանի գույքերին տիրանալու վերաբերյալ հարուցվել են քրեական գործեր: Այս քրեական գործերին հարուցվելուն զուգահեռ հարուցվել է մեկ այլ քրեական գործ՝ «Վելես» իրավապաշտպան ՀԿ նախագահ Մարինա Պողոսյանի նկատմամբ: Մարինա Պողոսյանը միջազգային կառույցների հայաստանյան ներկայացուցիչներին ահազանգում է, որ իր նկատմամբ հարուցված քրեական գործը 8 ամիս քննվել է, որի ընթացքում կատարվել են բազմաթիվ քրեադատավարական խախտումներ, մասնավորապես իր հետ առերեսումներ են կատարել զենքի առկայությամբ, բազմիցս առաջարկել են հրաժարվել Երիցյանի և այլոց վերաբերյալ հարուցված քրեական գործերից:

«Քրեական գործի նյութերից կորել են ցուցմունքներ եւ ստորագրություններ, ավելին, քրեական գործի քննության ընթացքում ձեռք են բերվել տեղեկություններ Երիցյանի կողմից կատարված խոշոր չափերի տնտեսական հանցագործության վերաբերյալ, որը կոծկվել է քննիչի եւ նրա վերադասի կողմից: Ինչպես նաև թիվ 13142214 քրեական գործի պատվիրատուները, հասկանալով, որ տեղի չեմ տալիս ճնշումներին, ի վերջո, կարճում են իմ վերաբերյալ ակնհայտ անհիմն հարուցված քրգործը: Մեկ այլ նախկին պաշտոնյայի՝ ՀՀ գլխավոր դատախազ Ս. Օսիպովի որդուց՝ Վիկտոր Տեր-Հովսեփյանի գործողություններից տուժած օտարերկրյա ներդրողների շահերի պաշտպանության և օտարերկրյա ներդրողների հաղորդումների հիման վրա հարուցված թիվ 13811015 քրեկան գործին զուգահեռ, ըստ ՀՀ քննչական կոմիտեի որոշ աշխատակիցների որդեգրած արատավոր պրակտիկայի, իմ վերաբերյալ հարուցվեց մեկ այլ՝ թիվ 14149815 քրեական գործը, որի շրջանակներում առանց օրինական հիմքերի խուզարկության փորձեր իրականացվեցին իմ մտերիմներին պատկանող բնակարաններում, թիվ 14149815 քրեական գործով նույնիսկ վկայի կարգավիճակ չունեցող անձանց գույքի վրա կալանք կիրառվեց, իսկ ինձ հարցաքննելու միջոցով սպառնալիքներ հնչեցվեցին իմ եւ իմ ընտանիքի ու մտերիմների հասցեին:

Փաստացի, ՀՀ Քննչական կոմիտեն ակնհայտ, անհիմն քրեական գործեր հարուցելու միջոցով փորձում է ինձ վրա ճնշում գործադրել, որպեսզի ո´չ ես, ո´չ մեր կազմակերպությունը չզբաղվի բարձրաստիճան պաշտոնյաների հակաօրինական գործողություններից տուժած ՀՀ և օտարերկրյա քաղաքացիների շահերի պաշտպանությամբ, որպեսզի գիտակցենք, որ ցանկացած փորձ բարձրաձայնելու նախկին և ներկա պաշտոնատար անձանց կողմից կատարված ապօրինությունները հանգեցնելու է հերթական քրեական գործի հարուցմանը իմ նկատմամբ Մենք հուսով ենք, որ ՀՀ Քննչական կոմիտեի նախագահը պատասխանատվություն կստանձնի իր ղեկավարած կառույցում քննիչների գործողությունների օրինականությունն ապահովելու եւ նրանց կողմից չարաշահումները, հովանավորչությունը և կոռուպցիոն ռիսկերը կանխելու համար, իսկ միջազգային եւ տեղական իրավապաշտպան կազմակերպություններն իրենց ջանքերը կներդնեն ոլորտում առկա ապօրինություններն ու մարդու իրավունքների խախտումների դեմ պայքարի հարցում»,- միջազգային կառույցներին ուղղված նամակում նշել է Մարինա Պողոսյանը:

Գագիկ Աղբալյան