Իրաքյան Քուրդիստանից մինչև նախընտրական ցուցակ․ ինչ կապ ունի Ռոման Մուրադյանը «Հանրապետության» հետ

Past.am-ի տեղեկություններով՝ 2024 թվականի մարտին Հայաստանի նախագահ Վահագն Խաչատուրյանի Իրաք կատարած պաշտոնական այցի ընթացքում պատվիրակությունը եղել է նաև Իրաքյան Քուրդիստանի մայրաքաղաք Էրբիլում։ Այցի շրջանակներում հանդիպումներ են կայացել Իրաքյան Քուրդիստանի նախկին նախագահ Մասուդ Բարզանիի և նախագահ Նեչիրվան Բարզանիի հետ։

Այդ օրերին գործարար Ռոման Մուրադյանը սոցիալական ցանցերում հրապարակել էր Նեչիրվան Բարզանիի հետ համատեղ լուսանկար, ինչից ենթադրվում էր, որ նա ևս ընդգրկված է եղել պաշտոնական պատվիրակության կազմում։ Շրջանառվող տեղեկությունների համաձայն՝ Մուրադյանն ակտիվ գործարար կապեր ունի Իրաքում, մասնավորապես՝ Իրաքյան Քուրդիստանում, և որոշակի դերակատարություն է ունեցել այցի կազմակերպման հարցում։

Վերջին օրերին Բարզանիի հետ արված լուսանկարները կրկին ակտիվ տարածում են ստացել համացանցում։ Քաղաքական և նախընտրական զարգացումների ֆոնին հետաքրքրություն է առաջացրել նաև այն փաստը, որ Ռոման Մուրադյանը ներգրավված է ընտրական գործընթացում։

Ինչպես հայտնի է դարձել, նա ընդգրկված է Հանրապետություն կուսակցությունի նախընտրական ցուցակում և բավական բարձր հորիզոնականում։

Քննարկումների առիթ է դարձել նաև այն հանգամանքը, որ արևմտամետ դիրքորոշմամբ հայտնի քաղաքական ուժի ցուցակում ընդգրկված է գործարար, որը հրապարակայնորեն ներկայացրել է Իրաքյան Քուրդիստանի ղեկավարության հետ իր կապերը։ Միևնույն ժամանակ, Նեչիրվան Բարզանին իր քաղաքական մոտեցումներում բազմիցս ընդգծել է հավասարակշռված արտաքին հարաբերությունների կարևորությունը՝ ներառյալ Ռուսաստանի հետ համագործակցության պահպանումը տնտեսական և տարածաշրջանային շահերի տեսանկյունից։

Մանրամասները՝ «Փաստ» օրաթերթի այսօրվա համարում