Արտյոմ Վարդանյանի ընդգրկումը՝ կարևոր քայլ ազգային քաղաքականության ոլորտում

Past.am-ի ունեցած տեղեկություններով՝ վերջին շրջանում փոփոխություններ են տեղի ունեցել Ռուսաստանի Դաշնության նախագահի մոտ գործող պետական ազգային քաղաքականության տարածաշրջանային ասպեկտների և հասարակական ինստիտուտների զարգացման հանձնաժողովի կազմում։ Մասնավորապես, հանձնաժողովի անդամ է ընտրվել Արտյոմ Վարդանյանը։

Վարդանյանը հանդիսանում է Ռուսաստանի Դաշնության Պետական դումայի ազգությունների հարցերով կոմիտեի փորձագիտական խորհրդի անդամ, ինչպես նաև «Ռուսաստանի հայերի միություն» համառուսաստանյան հասարակական կազմակերպության վարչության անդամ։ Բացի այդ, նա Մոսկվայում և Ռուսաստանի մի շարք տարածաշրջաններում հանդես է գալիս որպես «Ռուսաստանի հայերի միության» նախագահի լիազոր ներկայացուցիչ։

Հիշեցնենք, որ տվյալ հանձնաժողովի անդամ դառնալու համար գործում են բավական խիստ և բարձր չափանիշներ։ Դրանք ներառում են տվյալ անձի հեղինակությունը սեփական համայնքում, մասնագիտական և փորձագիտական պատրաստվածությունը, ինչպես նաև գործնական փորձառությունը ազգային քաղաքականության և հասարակական գործունեության ոլորտում։

Ինչ վերաբերում է հանձնաժողովի գործունեությանը, ապա այն մշտադիտարկում է Ռուսաստանի տարբեր տարածաշրջաններում միջէթնիկ հարաբերությունների վիճակը, վերլուծում է հնարավոր լարվածության ռիսկերը, համագործակցում ազգային-մշակութային ինքնավարությունների, կրոնական կառույցների և հասարակական կազմակերպությունների հետ։ Բացի այդ, հանձնաժողովը մշակում է մեթոդական առաջարկներ պետական մարմինների համար՝ միջմշակութային միջոցառումների կազմակերպման հարցերում, ուսումնասիրում օտարերկրացիների սոցիալական և մշակութային ինտեգրման խնդիրները՝ կոնֆլիկտների կանխարգելման նպատակով, ինչպես նաև պատրաստում է զեկույցներ, որոնք կարող են հիմք ծառայել նոր օրենսդրական նախաձեռնությունների կամ ՌԴ նախագահի հրամանագրերի համար։

Մանրամասները՝ «Փաստ» օրաթերթի այսօրվա համարում