Արմաիս Կամալովի անունը՝ նոր պաշտոնի շուրջ քննարկումների կենտրոնում

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Ինչպես գրում է  Past.am-ը, առաջիկայում հնարավոր է փոփոխություն տեղի ունենա Ռուսաստանի հայերի միության նախագահի պաշտոնում։ Մեր աղբյուրների փոխանցմամբ՝ նման քննարկումները պայմանավորված են մի շարք գործոններով, այդ թվում՝ միության ներկայիս ղեկավարության գործունեության շուրջ ձևավորված դժգոհություններով։

Ըստ շրջանառվող տեղեկությունների՝ ռուսական իշխանական որոշ շրջանակներում առկա է կարծիք, որ ներկայիս ղեկավարությունը բավարար չափով ինտեգրված չէ Հայաստանի հասարակական և քաղաքական դաշտի հետ, ինչպես նաև չունի անհրաժեշտ ազդեցություն համայնքային գործընթացների, այդ թվում՝ ընտրական զարգացումների վրա, չնայած այն հանգամանքին, որ միությունը ներկայացնում է Ռուսաստանում բնակվող ամենամեծ հայկական համայնքը։

 Past.am-ի տեղեկություններով՝ այս պահին դիտարկվում է նոր նախագահի հնարավոր թեկնածությունը։ Խոսքը հայազգի հայտնի բժիշկ, ակադեմիկոս Արմաիս Կամալովի մասին է։ Նա բժշկական գիտությունների դոկտոր է, պրոֆեսոր, ՌԳԱ ակադեմիկոս, ինչպես նաև ՀՀ ԳԱԱ արտասահմանյան անդամ։ Կամալովը ղեկավարում է Մոսկվայի Մ. Վ. Լոմոնոսովի անվան պետական համալսարանի բժշկական գիտակրթական ինստիտուտի համալսարանական կլինիկան և հանդիսանում է ԵՊԲՀ պատվավոր դոկտոր։

Նշվում է, որ Կամալովը տարբեր առիթներով ընդգծել է Հայաստանի նկատմամբ իր առանձնահատուկ վերաբերմունքը՝ այն անվանելով իր «էթնիկ կոդը»։ Նա նաև կարծիք է հայտնել, որ անհրաժեշտ է առավել ամրապնդել Սփյուռք–Հայաստան կապերը՝ ընդգծելով, որ գիտության և մշակույթի բազմաթիվ գործիչներ պատրաստ են իրենց ներդրումն ունենալ հայրենիքի զարգացման գործում՝ նույնիսկ արտերկրում բնակվելով։

 Past.am-ի աղբյուրների համաձայն՝ Կամալովի թեկնածությունը պատահական չի դիտարկվում։ Նա ճանաչված և հեղինակավոր անձ է թե՛ Ռուսաստանում, թե՛ Հայաստանում, ունի լայն կապեր տարբեր շրջանակներում և տարիներ շարունակ ակտիվ գործունեություն է ծավալում հայապահպանության և տարբեր նախաձեռնությունների իրականացման ուղղությամբ։

Մանրամասները՝ «Փաստ» օրաթերթի այսօրվա համարում

Հետևեք մեզ՝ այստեղ