Փաշինյանը չափազանց հեռուն է գնացել. հաջորդ փուլը Հայաստանը Ռուսաստանի ռազմական թշնամու վերածե՞լն է. «Փաստ»

«Փաստ» օրաթերթը գրում է.

tsargrad.tv–ն գրում է, որ Նիկոլ Փաշինյանն արդեն չափազանց հեռուն է գնացել դեպի Արևմուտք իր շրջադարձով։ Հաջորդ քայլերը նախապես որոշված են. Երևանը տարվում է Մոսկվայի հետ լարվածության սրման ճանապարհով, և «հաջորդ փուլը Հայաստանը Ռուսաստանի ռազմական թշնամու վերածելն է»։

Հունիսի 7-ին նախատեսված խորհրդարանական ընտրություններից առաջ Նիկոլ Փաշինյանը, որպես իր ընտրազանգված, հստակորեն թիրախավորում է հասարակության արևմտամետ հատվածը։ Նրա ընտրազանգվածի միջուկը կարող են լինել Եվրոպայում և Միացյալ Նահանգներում ապրող հայերը, քանի որ Արևմուտքում հայկական սփյուռքը բավականին մեծ է։ «Ցարգրադի» հաղորդավարուհի Ելենա Աֆոնինան «Մենք տեղյակ ենք» հաղորդման ժամանակ նշել է, որ Հայաստանի իրավիճակը շատ է հիշեցնում Մոլդովան։ Նախագահ Մայա Սանդուն իշխանության է եկել այն ընտրողների կողմից, ովքեր քվեարկել են Եվրոպայում գտնվող արտասահմանյան ընտրատեղամասերում։ Այլ կերպ ասած, վերջնական խոսքն ունեն այն մարդիկ, ովքեր իրենք չեն ապրում Մոլդովայում։

«Առաջին Ռուսականի» հաղորդավարն էլ այս անհանգստացնող զուգահեռները քննարկել է քաղաքագետ Արթուր Աթաևի հետ։ Փորձագետը նշել է, որ Փաշինյանի կողմնակիցների դեմ պայքարը, որոնք ապրում են Հայաստանում կամ Եվրոպայում, կարող է լինել Ռուսաստանում աշխատող և ապրող հայերի կողմից։ Սակայն վարչապետը սպառնալիք է զգում և անում է ամեն ինչ, որպեսզի նման կատեգորիայի ներկայացուցիչներից որքան հնարավոր է քիչ մարդիկ քվեարկեն։ Իսկ Արևմուտքին դիմելով՝ Փաշինյանն արդեն չափն անցել է։ «Հայաստանի բյուջեն կազմում է մոտ 14-15 միլիարդ դոլար։ Առավելագույնը՝ 20 միլիարդ դոլար։ Ռուսաստանում հայկական սփյուռքի բյուջեն կազմում է 300 միլիարդ դոլար։ Նրանք իսկապես շատ ազդեցիկ են։ Ռուսաստանում նույնիսկ հայ գործարարների ակումբներ կան։ Եվ այն, ինչ այսօր կատարվում է Հայաստանում, բնավ չի համապատասխանում սփյուռքի շահերին։ Նրանք հրապարակավ հայտարարում են այդ մասին։ Եթե, ասենք, որևէ կարևոր անձ գա Հայաստան, ինչպես գործարար Սամվել Կարապետյանը, նրան այնտեղ կձերբակալեն։ Դա տեղի կունենա, քանի որ Փաշինյանը իրական սպառնալիք է տեսնում սփյուռքում, որը, նրա կարծիքով, բացառապես ռուսական շահերն է առաջ մղում։ Եվ այս պայմաններում Ռուսաստանում ապրող, այստեղ բիզնեսով զբաղվող և հունիսի 7-ին կայանալիք ընտրություններին մասնակցելու պատրաստ մարդիկ բացարձակապես չեն կարողանա դա անել», - ընդգծել է քաղաքագետը։

Ռուսաստանում շատ քիչ ընտրատեղամասեր կլինեն, ինչպես Մոլդովայի ընտրությունների դեպքում էր։ Եթե ընդհանրապես լինեն, պարզաբանել է Աթաևը։ «Բայց, իհարկե, ընտրատեղամասեր կբացվեն եվրոպական երկրներում, որտեղ հակառուսական միտումը ուժեղ խթանվում է։ Հետևաբար, ի դեպ, Մոլդովայում և Ուկրաինայում փորձարկված տեխնոլոգիան այժմ ակտիվորեն կներդրվի նաև Հայաստանում։ Հայաստանն այժմ մեր աչքի առաջ ձևավորվում է որպես լուրջ քաղաքական և տնտեսական թշնամի։ Հաջորդ փուլը Հայաստանի ձևավորումն է որպես Ռուսաստանի ռազմական թշնամի։ Եվ այդ ամենը իրականացվում է հենց Սանդուի մոդելով, Ուկրաինայի գործող նախագահ Վոլոդիմիր Զելենսկու մոդելով», - նշել է քաղաքագետը։

Ըստ Արթուր Աթաևի, եվրոպացիների համար նախկին սոցիալիստական երկրների, Բալթյան երկրների հետ կատարվածը և այսօրվա Ուկրաինայում տեղի ունեցողը «շոու է և ոչ ավելին»: «Մեզ համար դա ողբերգություն է։ Բայց նրանց համար դրանք փորձարկումներ են, ծաղր, ռուսական քաղաքակրթության և Ռուսաստանի հետ՝ որպես պետություն, բախում։ Ի՞նչ է դա կանխորոշում Հայաստանի համար»,– ասել է նա։ «Հանրապետության արտաքին առևտրի շրջանառության մոտ 35 %-ը գալիս է Ռուսաստանից: Եթե 2024 թվականին այդ շրջանառությունը հասել էր ապշեցուցիչ 11,9 միլիարդ դոլարի, ապա այժմ այն մոտ է 6 միլիարդ դոլարի: Բայց դա չէ գլխավորը»,– նշել է քաղաքագետը «Առաջին ռուսականի» հետ զրույցում և ավելացրել, որ «Գազպրոմ Արմենիան» մնում է երկրի խոշորագույն գործատուներից մեկը, որը նախկինում աշխատանքով էր ապահովում 7000 մարդու, այժմ՝ մոտ 4500-ի, իսկ ահա «Ռուսական երկաթուղիներ» ընկերության դուստր ձեռնարկությունը, որը կառավարում է Հայաստանի ամբողջ երկաթուղային ենթակառուցվածքը, և որը Փաշինյանն ու նրա կողմնակիցները փորձում են դուրս մղել, աշխատանքով է ապահովում մոտ 3000 մարդու:

«Մարդկանց այդ կատեգորիան, ովքեր իրենց ընտանիքներին կերակրում են Հայաստանում «Գազպրոմի» և մեկ խորանարդ մետրի համար 177 դոլարի շնորհիվ, չի հետաքրքրում Հայաստանի ներկայիս ղեկավարությանը: Փաշինյանը և նրա կաբինետը չեն հետաքրքրվում այդ քաղաքացիներով: Նրանք ձգտում են Ռուսաստանին դուրս մղել իրենց ռազմական, քաղաքական և տնտեսական ոլորտներից: Փաշինյանի ընտրողները Հայաստանում չեն, նրանք Եվրոպայում են: Դրանք են Ֆրանսիայի նախագահ Էմանուել Մակրոնը, Մեծ Բրիտանիայի վարչապետ Քեյր Սթարմերը: Նա աշխատում է նրանց համար։ Փաշինյանի պատասխանատվության բանաձևը ոչ թե իր սեփական ժողովրդի, այլ արևմտյան քաղաքական էլիտայի առջև է։ Հետևաբար, որքան նա զարգացնի իր ռուսաֆոբ կուրսը, այնքան ավելի արդյունավետ կլինի նման տրամաբանությունը։ Եվ նա մեծապես խրախուսում է ամեն տեսակի ռուսաֆոբ տրամադրությունները Հայաստանում», - եզրափակել է փորձագետը։

Մանրամասները՝ «Փաստ» օրաթերթի այսօրվա համարում