Վթար Եղվարդ-Նոր Գեղի ճանապարհին. Չորս մարդ վիրավորվել է

Փրկարար ծառայությունը հուլիսի 13-ին, ժամը 14.11-ին ահազանգ է ստացել, որ Եղվարդ-Նոր Հաճն ավտոճանապարհին` կամրջի մոտակայքում, տեղի է ունեցել ՃՏՊ, կան տուժածներ. անհրաժեշտ է փրկարարների օգնությունը:

Դեպքի վայր է մեկնել մեկ մարտական հաշվարկ:

Պարզվել է, որ Եղվարդ-Նոր Գեղի ավտոճանապարհի 9-րդ կմ-ում բախվել են «Միցուբիշի Կորսեկա» մակնիշի 34MQ608 (վարորդ՝ Ա. Հ., ծնվ. 1989թ.) եւ «Միցուբիշի Պաջերո» մակնիշի 020VV20 պետհամարանիշներով (վարորդ՝ Գ. Ս., ծնվ. 1961թ.) ավտոմեքենաները:

Մինչ հրշեջ-փրկարարների կանչի վայր հասնելը՝ «Միցուբիշի Կորսեկա» ավտոմեքենայի ուղեւոր Ս. Հ.-ը (ծնվ. 1965թ.) տարբեր աստիճանի մարմնական վնասվածքներով հոսպիտալացվել է Աբովյան քաղաքի բժշկական կենտրոն, որտեղ բժիշկները նրա առողջական վիճակը գնահատել են ծանր: Մյուս ուղեւորները` Մ. Պ.-ը (ծնվ. 1990թ.) եւ Ա. Հ.-ը (ծնվ. 2015թ) տարբեր աստիճանի մարմնական վնասվածքներով հոսպիտալացվել են Եղվարդ քաղաքի բժշկական կենտրոն, այնուհետեւ Մ.Պ.-ը` Երեւանի Արմենիա ՀԲԿ, իսկ Ա.Հ.-ը` Սուրբ Աստվածամայր ԲԿ: Բժիշկները տուժածների առողջական վիճակը գնահատել են ծանր:

Հրշեջ-փրկարարները «Միցուբիշի Պաջերո» մակնիշի ավտոմեքենայի վարորդ Գ.Ս.-ին դուրս են բերել ավտոմեքենայից եւ մոտեցրել շտապօգնության ավտոմեքենային: Վերջինս հոսպիտալացվել է Երեւանի Իզմիրյան ԲԿ, որտեղ բժիշկները նրա առողջական վիճակը գնահատել են բավարար:

Հրշեջ-փրկարարները հոսանքազրկել են ավտոմեքենաները եւ փակել գազի փականները: