Հորը տարել են անտառ և սպանել․ նոր մանրամասներ աղմկահարույց հաշվեհարդարից

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին 

Լիպեցկի մարզի Դանկովսկի շրջանում աղմկահարույց սպանության գործով ձերբակալվել է երկու կասկածյալ։ Քննիչների վարկածով՝ նրանցից մեկը սպանված տղամարդու որդին է, որը, ըստ իրավապահների, ընկերոջ հետ նախապես ծրագրել էր հոր սպանությունը։

42-ամյա Ալեքսեյ Կրապիվինի և նրա 18-ամյա որդու՝ Արտյոմի անհետացման մասին իրավապահ մարմինները տեղեկացել էին մայիսի 23-ին, երբ հարազատները հայտնել էին, որ երկուսն էլ դադարել են կապ հաստատել։

Լրատվամիջոցների տվյալներով՝ մայիսի 22-ին Ալեքսեյ Կրապիվինը իր կապույտ Daewoo Matiz մակնիշի մեքենայով մեկնել էր որդուն քոլեջից տուն բերելու համար։ Դրանից հետո նրանք այլևս տուն չէին վերադարձել։

Վերջին անգամ մեքենան ֆիքսվել էր Լեբեդյանի անցակետի տեսախցիկների կողմից, իսկ որոշ ժամանակ անց անհասանելի էին դարձել նաև նրանց բջջային հեռախոսները։ Որոնողական աշխատանքներին միացել էր շուրջ 50 մարդ՝ այդ թվում հարևաններն ու կամավորները։

Ավելի ուշ քննիչները Լեբեդյանսկի շրջանի անտառապատ հատվածում հայտնաբերել են անհետ կորած տղամարդու մեքենան, իսկ մոտակայքում՝ նրա դին՝ բռնի մահվան հետքերով։ Քննչական կոմիտեի տվյալներով՝ տղամարդը մահացել է գլխին հասցված կրակոցից։

Մի շարք ոչ պաշտոնական աղբյուրներ և Telegram-ալիքներ նաև հայտնել են, որ մարմնի վրա հայտնաբերվել են դանակի հարվածների հետքեր, սակայն այս տեղեկությունը պաշտոնապես չի հաստատվել։

Ըստ լրատվամիջոցների հրապարակումների՝ սպանության մեջ կասկածվող Արտյոմ Կրապիվինն ու նրա ծանոթ Դմիտրին նույն գյուղից են և միասին են սովորել։ Քննիչների վարկածով՝ նրանք հանցագործությունը ծրագրել էին ամիսներ շարունակ։

Ոչ պաշտոնական տեղեկությունների համաձայն՝ կոնֆլիկտը կարող էր կապված լինել ապօրինի զենքերի պատրաստման և դրանց վաճառքի հետ։ Ըստ այդ վարկածի՝ հայրը տեղեկացել էր որդու գործունեության մասին, ինչից հետո նրանց միջև լարվածություն էր առաջացել։

Ռուսաստանի քննչական կոմիտեի փոխանցմամբ՝ հանցագործությունը կատարվել է նախնական համաձայնությամբ։ Ըստ քննության՝ կասկածյալներից մեկը կրակել է տղամարդու գլխին, որից հետո նրանք դին տեղափոխել են անտառ և հեռացել դեպքի վայրից։

Իրավապահները հետագայում հայտնաբերել և ձերբակալել են երկու կասկածյալներին։ Լրատվամիջոցների տվյալներով՝ նրանցից մեկը հարցաքննության ընթացքում խոստովանել է կատարվածը։

Ներկայում քննիչները միջնորդություն են պատրաստում կասկածյալների նկատմամբ կալանքը որպես խափանման միջոց ընտրելու համար։ Նշանակվել են մի շարք դատաբժշկական փորձաքննություններ, իսկ գործի քննությունը շարունակվում է։

Հետևեք մեզ՝ այստեղ