Ոստիկանների հետ միևնույն համատեքստում գործած պատգամավորը չի ուզում նրանց հետ միևնույն աթոռին նստել (տեսանյութ)

Ելենա Օվսյաննիկովան ընդդեմ ՀՀ ոստիկանության, ոստիկանապետի տեղակալ Հունան Պողոսյանի, ոստիկանապետի խորհրդական Նարեկ Մալյանի և ԱԺ պատգամավոր Էդմոն Մարուքյանի՝ պատվին, արժանապատվությանը հասցված վնասի հատուցման պահանջի մասին քաղաքացիական գործով հայցի հարուցման պահից պատգամավոր Էդմոն Մարուքյանն անհանգստություն է ցուցաբերում ոստիկանության հետ միևնույն՝ պատասխանողի աթոռին հայտնված լինելու հանգամանքից և ջանում իր դեմ ներկայացված հայցն առանձնացնել ոստիկանության դեմ հայցից:

Ինչպես վերջին նիստում էլ պարզվեց՝ պատգամավորի մտահոգությունն այն է, որ իր անունը չկապվի Բաղրամյանի ցույցերի, դրանց ընթացքում ոստիկանության գործողությունների և, առհասարակ, ոստիկանության հետ: Մարուքյանի մասով գործը ոստիկաններից առանձնացնելու վերաբերյալ միջնորդության մեջ ի թիվս այլ պատճառաբանությունների՝ պատգամավորի ներկայացուցիչը մասնավորապես պնդում էր, որ Մարուքյանի գործողություններն ու նպատակը ոստիկանության հետ նույնը չեն եղել Բաղրամյանի ցույցերի ժամանակ և որ հասարակության մեջ պատգամավորի դերը տարբեր է ոստիկանության դերից: Հայցվորի ներկայացուցիչները, սակայն, դատարանի ուշադրությանը հրավիրեցին, որ հասկանալի է՝ դա միգուցե ցանկալի արդյունք է Մարուքյանի համար, բայց արդարադատության շահն ու գործի հանգամանքները լրիվ այլ իրավիճակ են ստեղծում, և եթե նույնիսկ Մարուքյանի մասով փորձ արվի գործն անջատել այլ վարույթում, միևնույնն է, Բաղրամյան պողոտայում տեղի ունեցած դեպքերը պետք է քննարկվեն, որոնց կապակցությամբ Մարուքյանը կատարել է իր արտահայտություններն ու հրապարակումները: Դատավորը մերժեց Մարուքյանի մասով գործը ոստիկաններից առանձնացնելու միջնորդությունը և միաժամանակ հաստատված համարեց, որ «հայցադիմումով մատնանշված հանգամանքները տեղի են ունցել հունիսի 23-24 իրադարձությունների համատեքստում»:

Բացի այն, որ անկախ պատգամավորի և ոստիկանների գործողությունները բոլորը միևնույն՝ էլեկտրաէներգիայի թանկացման դեմ «Էլեկտրիկ Երևան» շարժման համատեքստում են իրականացվել, ըստ Ելենա Օվսյաննիկովայի ներկայացուցիչներ Լուսինե Հակոբյանի և Տիգրան Եգորյանի՝ ոստիկանության երկու բարձրաստիճան պաշտոնյաներն ու պատգամավոր Մարուքյանն ամենևին էլ պատահական չէ, որ փորձել են խաղարկել սլավոնական արտաքինով կնոջ ներկայությունը ցույցի վայրում, այլ օգտագործել են այն Արևմուտքի կողմից Ուկրաինայում օգտագործված «մայդանային» սցենարով, որպեսզի նվազեցնեն օրեցօր ավելացող ցուցարարների թիվը, ինչպես նաև վարկաբեկեն բողոքի ցույցի ակտիվ մասնակիցներին: Իսկ որ Մարուքյանի և ոստիկանության գործողությունները համակարգված են եղել, փաստաբանները չեն կարող զերծ մնալ նման կասկածից, քանի որ և՛ պատգամավորը, և՛ ոստիկանները Ելենային մեղադրել են սադրիչ լինելու մեջ:

Փաստաբան Լուսինե Հակոբյանը, մեկնաբանելով նաև պատգամավոր Մարուքյանի՝ իր մասով գործն անջատելու և առանձին վարույթում քննելու միջնորդությունը, նկատում է. «Հասկանալի է, որ ոստիկանության վարկանիշն այնպիսին է, որ Մարուքյանը, լինելով ԱԺ պատգամավոր, չի ցանկանում ասոցացվել ոստիկանության հետ, հանդես գալ միևնույն գործի շրջանակներում, նրանց հետ նստել միևնույն նստարանին՝ իր ներկայացուցչի միջոցով թեկուզև, բայց գտնում ենք, որ դա անհրաժեշտ և բավարար նախապայման չէ հայցերն առանձնացնելու համար, մանավանդ որ խոսքը վերաբերում է միևնույն միջադեպին, ինչպես հիմնավորեցինք դատական նիստով և այդ միջադեպի առնչությամբ պատասխանողներից յուրաքանչյուրի տված արձագանքին»:

Ի դեպ, հայցվոր կողմն ավելացրել է Մարուքյանի դեմ հայցապահանջը` 1 միլիոնից հասցնելով 2 մլն ՀՀ դրամի՝ պայմանավորված հայցադիմումին նրա կողմից ներկայացված պատասխանով: Իշխանական ուժերի հետ միևնույն համատեքստում գործողություններից հետո, սակայն, պատասխանով փորձ է արվել «արդարացնել» պատգամավորին: Այսպես՝ նշված է, թե Մարուքյանը Ելենային «հարբեցող» կամ «հարբած» չի անվանել, նրա գրառումը վերաբերել է ընդհանրապես այդ պահին զգացած ալկոհոլի հոտին: «Ալկոհոլի հոտը կարող է զգացվել ոչ միայն հարբած լինելու պատճառով, այլև այլ պատճառներով, որոնք տվյալ պարագայում անհնար է բացահայտել, օրինակ՝ ցուցարարների հոծ բազմության մեջ, որտեղ կանգնած էր նաև հայցվորը, հնարավոր է մեկ այլ անձ է ալկոհոլային խմիչք օգտագործած եղել, որի պատճառով ալկոհոլի հոտ է զգացվել այն կողմից, որտեղ գտնվել է Օվսյաննիկովան»,- նշված է Մարուքյանի պատասխանում:

Մյուս ձևակերպման հետ կապված, թե Մարուքյանն իր «Ֆեյսբուքում» ոչ թե գրել է, որ սադրանք է կանխել, այլ «մի թեթև պրովոկացիա», այդ գրառմամբ էլ ոչ թե Ելենայի անձի կամ նրա կատարած գործողությունների մասին է խոսել, այլ նկատի է ունեցել իրավիճակը, պահը և վայրը, որտեղ հայտնվել է Ելենան, և այլն: Ելենա Օվսյաննիկովայի ներկայացուցիչները սա դիտարկում են որպես ծաղր իրենց վստահորդի նկատմամբ, քանի որ Ելենային պատճառված բարոյական վնասը մեղմելու որևէ ջանք այդպես էլ չի գործադրվել, դեռ մի բան էլ հակառակն է արվել Մարուքյանի կողմից:

«Փոխարենը ուղղակի անողջամիտ բացատրություններ են տրված, թե պրովոկացիա ասելով նա տեղ է նկատի ունեցել, այլ ոչ մարդու, կամ նրա վրայից ալկոհոլի հոտ ասելով՝ նկատի չի ունեցել, որ նա հարբած է եղել, այլ որ միգուցե կանգնած է եղել ինչ-որ մարդկանց կողքին, որոնք ալկոհոլ էին օգտագործել, և գուցե հենց այդ պատճառով այդ հոտը անցել է նրան … և այլն, այս կարգի անողջամիտ բացատրությունները մեր կարծիքով ծաղր են մեր վստահորդի նկատմամբ: Դա է պատճառը, որ մենք փոփոխել ենք հայցապահանջը»,-ասում է Լուսինե Հակոբյանը:

Ադրինե Թորոսյան