«Անցյալի ապագա». Տերյան մշակութային կենտրոնի նոր հավաքածուն՝ հայկական գորգերի թանգարանային նմուշների նախշերի ու ատրիբուտների հիման վրա

Life.panorama.am-ը գրում է.

Փետրվարի 19-ին՝ ժամը 19:00-ին, Մեգեյան կարպետի ցուցասրահը, որը գտնվում է Մադոյան 9 հասցեում, հրավիրում է դիտելու Տերյան մշակութային կենտրոնի նոր, առօրյա հագուստների հավաքածուն: Ցուցահանդեսը կրում է «Անցյալի ապագա» խորագիրը, սա Մեգեյան կարպետ ցուցասրահիի հետ համատեղ աշխատանք է: Տերյան մշակութային կենտրոնն ու Մեգեյան կարպետն այս հավաքածուում կիրառել են հայկական գորգերի թանգարանային նմուշների նախշեր ու ատրիբուտներ. Այս մասին Life.panorama.am-ին հայտնել է Տերյան մշակութային կենտրոնի մենեջեր Մարիամ Վարդանյանը:

«Տերյան մշակութային կենտրոնը զբաղվում է  հայկական մշակությի պահպանմամբ եւ քարոզչությամբ: Նախկինում մենք ստեղծել ենք հայկական տարազներ, տարազային էլեմենտներով ոճավորված հագուստներ, իսկ այս անգամ ստեղծել ենք առօրյա հագուստ՝ թանգարանային նմուշի գորգերի նախշերի հիման վրա: Մեծ սիրով փետրվարի 19-ին կսպասենք մեր հյուրերին, ովքեր հնարավորություն կունենան տեսնելու մեր նոր հավաքածուն»,- նշեց Մարիամ Վարդանյանը:

Տերյան մշակութային կենտրոնի՝ մինչ այս իրականացրած գործունեությունը բավականին բարձր է գնահատվել. «12 տարի է, ինչ մենք գործում ենք, իսկ վերջին չորս տարիներին մենք շատ մեծ պրոպագանդայով ենք զբաղվում ու բավականին մեծ տարածում ունենք: Ուրախ ենք, որ հայկական էլեմենտներով տեսահոլովակներ նկարահանելիս կամ համերգներ պատրաստելիս մեր արտիստները մեծ մասամբ հենց մեզ են դիմում, մենք էլ սիրով համագործակցում ենք նրանց հետ: Մենք շատ հայտնի ենք նաեւ արտերկրում ապրող հայ համայնքների շրջանում, քանի որ տարբեր երկրներից պարբերաբար ցուցահանդես ունենալու հրավերներ ենք ստանում: Այս պահին էլ կան մի շարք հրավերներ, որոնք շուտով կյանքի կկոչվեն»,- պատմեց մենեջերը:

Տերյան մշակութային կենտրոնի նոր, առօրյա հագուստների հավաքածուի դիզայնով զբաղվում է կենտրոնի գործադիր տնօրեն Լիլիթ Մելիքյանը: Ցուցահանդեսին ներկա կլինեն քաղաքական գործիչներ եւ շոու բիզնեսի ներկայացուցիչներ:

«Ուրախալի փաստ է, որ մեր երիտասարդները հետաքրքրված են հայկական զարդանախշերով, էթնիկ ատրիբուտներով, իսկ մեր նոր հավաքածուն, որը նախատեսված է առօրյայում կրելու համար, ըստ իս, էլ ավելի ոգեւորությամբ պետք է ընդունվի: Բացի այդ, ողջ աշխարհում այսօր էթնիկ մշակույթը շատ մեծ տեղ է զբաղեցնում, ու զարմալաի չէ, որ մեզ մոտ էլ վերջին չորս տարում է այն ավելի շատ զարգացել: Այսօր մեր երիտասարդները հետաքրքրված են ոչ միայն էթնիկ ատրիբուտներով հագեցած հագուստներով, այլեւ նմանատիպ հայկական աքսեսուարներով ու զարդերով: Կարծում եմ՝ հայկական էթնիկ նորաձեւությանը մի օր շատ «կրելի» է դառնալու Հայաստանում»,- հավելեց Մարիամ Վարդանյանը:

Հեղինակ՝ Անուշիկ Մելքոնյան