Որպես մարզիչ գնացել էի «վա-բանկ», որպեսզի հաղթենք․ Եղիշե Մելիքյան

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին 

Հայաստանի ազգային հավաքականը Երևանի Վազգեն Սարգսյանի անվան «Հանրապետական» ստադիոնում կայացած ընկերական խաղում ոչ-ոքի (1:1) խաղաց Մոլդովայի ընտրանու հետ։

Հանդիպումից հետո կայացած մամուլի ասուլիսի ընթացքում ազգային թիմի գլխավոր մարզիչ Եղիշե Մելիքյանն ամփոփել է արդյունքները՝ խոսելով թիմի տակտիկական խնդիրների, ֆուտբոլիստների անհատական դրսևորումների և երկրպագուների սպասելիքների մասին:

Գլխավոր մարզիչն ընդգծել է, որ թիմը գրոհող ֆուտբոլ է խաղացել առաջինից մինչև վերջին րոպեն, սակայն արդյունքի հասնելուն խանգարել են բախտի գործոնն ու որակի որոշակի պակասը հարձակման եզրափակիչ փուլում:

«Որպես մարզիչ գնացել էի «վա-բանկ», որպեսզի հաղթենք: Ներողություն եմ խնդրում, որ այսօր չկարողացանք ուրախացնել մեր երկրպագուներին: Տղաները շատ լավ աշխատեցին, հանդիպումը նորմալ եմ գնահատում, սակայն հասկանալի է՝ եթե հաղթանակ չկա, ուրեմն ինչ-որ բան այն չէ: Մրցակիցը փորձում էր խանգարել մեզ, իսկ մենք վերջնամասում չկարողացանք իրացնել մեր ռեալ գոլային պահերը: Տակտիկայի խնդիր չկա, պարզապես պետք է գտնենք այն ֆուտբոլիստներին, ովքեր ի վիճակի են հարվածը հասցնել տրամաբանական ավարտի»,- նշել է Մելիքյանը:

Ասուլիսի ընթացքում անդրադարձ է կատարվել նաև ՀՖՖ նախագահ Արմեն Մելիքբեկյանի հրաժարականը պահանջող երկրպագուների ակցիաներին:

«Այդ պահանջներն իսկապես ազդում են ընդհանուր մթնոլորտի վրա: Ես հանդիպել եմ երկրպագուների հետ, մենք հասկացել ենք միմյանց, սակայն ես որոշում եմ կայացրել այլևս չխառնվել այդ դաշտի խնդիրներին: Խնդրում եմ հավատալ մեր թիմին և զինվել համբերությամբ: Մենք ճիշտ ճանապարհի վրա ենք, ունենք հիանալի, նվիրված կոլեկտիվ»,- շեշտել է գլխավոր մարզիչը:

Ամփոփելով հունիսյան երկու ընկերական հանդիպումները (նախորդ խաղում Հայաստանը 1:1 հաշվով էր ավարտել հանդիպումը Ղազախստանի հետ)՝ Եղիշե Մելիքյանը նշել է, որ մարզչական շտաբը ստացավ իրեն հուզող հարցերի պատասխանները: Այժմ գլխավոր նպատակը վերլուծություններ կատարելն ու աշնանը կայանալիք պաշտոնական հանդիպումների համար մեկնարկային կազմի հիմնական կորիզը ձևավորելն է:

«Ընդհանուր առմամբ՝ թիմից գոհ եմ: Չհաղթեցինք միայն գոլ չխփելու պատճառով: Հույս ունեմ, որ Վահան Բիչախչյանի և Ֆինն Գերագուտյանի պես ֆուտբոլիստների օգնությամբ կկարողանանք լուծել պահերի իրացման խնդիրը»,- եզրափակել է Եղիշե Մելիքյանը:

Հետևեք մեզ՝ այստեղ