HandArt-ում կայացավ «Մեր Կարմիր Կանաչ տունը» ներկայացման առաջնախաղը

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

«ՀանդArt» մշակութային այգում  հունիսի 13-ին և 14-ին տեղի ունեցավ նոր «Մեր Կարմիր Կանաչ տունը» ներկայացման առաջնախաղը։ Ընտանիքի, սիրո և արվեստի մասին այս տրագիկոմեդիայի սցենարը գրել  է Տիգրան Գյուլումյանը, իսկ բեմադրել է Արթուր Սարիբեկյանը։ Գլխավոր դերերը մարմնավորում են Ջուլիետա Ստեփանյանը և Սամվել Բաղինյանը, ներկայացման մեջ ներգրավված են նաև Իշխան Ղարիբյանը, Արուս Գրիգորյանը, Անի Պետրոսյանը և Տիգրան Գյուլումյանը։ 

Ընտանիքը կանգնած է բարդ իրավիճակի առաջ, զավակները՝ Արուսի և Իշխանի դերակատարները, փորձում են տալ իրենց լուծումը, որը ծնողների սրտով չէ։ Լարված իրավիճակում հայտնվում է սկանդալային լրագրողը՝ Անի Պետրոսյանի կերպարը, որը դառնում է նրանց հաջողության գրավականը։

«Մեր Կարմիր Կանաչ տունը» ներկայացում է, որտեղ հումորը թաքցնում է խորը ցավը, լռությունը բացահայտում է չասված խոսքերը, իսկ թվացյալ սովորական հարաբերությունները՝ մարդու ամենաանձնական զգացմունքները։ Դերասանների խոսքով՝ ներկայացման մեջ քննվող թեմաներն արդիական են բոլոր ընտանիքների համար։  Ներկայացված խնդիրներն ու հարցերը հատկապես տարածված են հայկական ընտանիքներում՝ հայրենիքը լքելու մտքեր, պատերազմի հետևանքներ, սերունդների բախում, սեր և պատասխանատվություն։

«Թատրոնի եզակի առանձնահատկություններից մեկն այն է, որ  խաղացանկում ներառված են բացառապես հայ հեղինակների ստեղծագործություններ՝ թե՛ ժամանակակից, թե՛ դասական։ Այսինքն՝ մեր թատրոնը միայն հայերի մասին է», - նշեց Գյուլումյանը։

Դերասանների խոսքով՝ նման կազմի հետ աշխատելը հաճույք էր, ուրախություն և մեծ պատիվ: Երկար փորձեր, իմպրովիզներ ու արդեն հանդիսատեսը տեսնում է ներկայացման վերջնական տարբերակը։ Կազմը շեշտում է՝ ժամանակակից խնդիրները դիպչում են հանդիսատեսի սրտին՝ նրանց տալիս մտորելու առիթ, թե ինչպես վարվել բարդ իրավիճակում։

 Թատրոնի պրոդյուսեր  Գյուլումյանը նշեց, որ HandArt թատրոնը դարձել է նոր թատերական շարժման՝ «նեո-նատուրալիզմի» առաջին ներկայացուցիչն աշխարհում։  Նա պատմեց, որ ամիսներ առաջ՝ Միջազգային թատերական ֆորումում, հայ թատերագետ Անուշ Ասլաբեկյանը ներկայացրել էր HandArt թատրոնի գործունեության, դրա հայեցակարգի և առանձնահատկությունների վերաբերյալ իր հետազոտությունը, որը միջազգային լրատվամիջոցների ուշադրությանն էր արժանացել։ Դրան հաջորդել էր կազմակերպության ղեկավարության կոչը՝  արտոնագրել HandArt թատրոնը, քանի որ նրանց հետազոտությունը ցույց է տվել, որ այս հայկական թատրոնը եզակի է աշխարհում իր ձևաչափով և ոճով։

«Աշխարհում կան բազմաթիվ բացօթյա թատրոններ և ներկայացումների վայրեր։ Բայց մենք առաջինն ու միակն ենք, որ ստեղծել ենք բացօթյա թատրոն՝ մշտական խաղացանկով», - ասաց Գյուլումյանը՝ հավելելով, որ HandArt-ը ճանաչվել է որպես նոր թատերական շարժման՝ «նեո-նատուրալիզմի» ներկայացուցիչ։

 

Հետևեք մեզ՝ այստեղ