Վերանորոգումը վտանգավոր է. «Հայփոստը» պարզաբանում է

«Հայփոստ»-ն անդրադարձել է ընկերության՝ որոշ սահմանամերձ գյուղերում գործող մասնաճյուղերի անբարեկարգ վիճակին վերաբերող մեր հրապարակմանը, ներկայացրել պարզանումներ այն մասին, թե ինչու տարիներ շարունակ դրանք չեն վերանորոգել:

Հիշեցնենք, մեր հրապարակման մեջ նշել էինք, որ «Հայփոստ»-ի Բարեկամավանի մասնաճյուղը (Տավուշի մարզ) տասնյակ տարիներով չի վերանորոգվել, ավելին՝ այն կարծես խրճիթ լինի:

«Հայփոստ»-ից պարզաբանում են հետեւյալը. որոշ սահմանամերձ գյուղերում անվտագության խնդիր կա, ու չնայած դրանցից մի քանիսի մասնաճյուղերի վերանորոգումը ներառված է եղել ընկերության առաջնահերթությունների շարքում, հաճախ շինարարական կազմակերպություններն իրենք են հրաժարվում այնտեղ աշխատանքներ իրականացնել, քանի որ համայնքն ուղիղ նշանառության տակ է վերցված ադրբեջանական զինուժի կողմից:

«Հայփոստ»-ը նաեւ մեզ է ներկայացրել Տավուշի մարզի սահմանամերձ այն համայնքների ցանկը, որտեղ կա՛մ սկսվել են վերանորոգման աշխատանքներ, կա՛մ պլանավորված են: Դրանց թվում են Արծվաբերդը եւ Նորաշենը, որտեղ վերանորոգման աշխատանքներն արդեն սկսվել են: Իսկ ահա Բերդավանի մասնաճյուղն ընդգրկված է վերանորոգման ենթակա կառույցների ցանկում, սակայն, ինչպես հայտնեցին ընկերությունից, կրկին անվտանգության նկատառումներից ելնելով՝ շինարարական աշխատանքները չեն կարողանում սկսել:

Հայփոստ ընկերությունից նաեւ հայտնեցին, որ վերջին տարիներին ավելի քան 250 մասնաճյուղ է վերանորոգվել եւ բարեկարգվել հանրապետության տարբեր մարզերում:

Գագիկ Աղբալյան