Զելենսկին չի մեկնի Լեհաստան՝ Ուկրաինայի վերականգնման հարցերով համաժողովին

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին 

Ուկրաինայի վարչապետ Յուլիա Սվիրիդենկոն կգլխավորի ուկրաինական պատվիրակությունը Գդանսկում անցկացվելիք Ուկրաինայի վերականգնման հարցերով համաժողովում (URC-2026)՝ նախագահ Վլադիմիր Զելենսկու փոխարեն։ Դրա մասին նա հայտնել է սոցիալական ցանցերում հունիսի 23-ին։

Ըստ Սվիրիդենկոյի՝ ուկրաինական պատվիրակության կազմում կընդգրկվեն բիզնեսի ներկայացուցիչներ, պետական ընկերությունների ղեկավարներ, տարածքային համայնքների ներկայացուցիչներ, ինչպես նաև կառավարության և խորհրդարանի անդամներ։ Նա նշել է, որ համաժողովի ընթացքում նախատեսված են մի շարք միջոցառումներ, որոնք ուղղված են Լեհաստանի, եվրոպական պետությունների և այլ գործընկերների հետ Ուկրաինայի համագործակցության ամրապնդմանը։

Վարչապետն ընդգծել է, որ Կիևն ակնկալում է ֆորումի արդյունքներով հասնել կոնկրետ պայմանավորվածությունների, որոնք կնպաստեն երկրի պաշտպանունակության ու դիմակայունության ամրապնդմանը, ինչպես նաև տնտեսական համագործակցության ընդլայնմանը։ Սպասվում է մի քանի կարևոր համաձայնագրերի ստորագրում, ներառյալ՝ էներգետիկայի ոլորտում։

Ավելի վաղ Լեհաստանի նախագահի գրասենյակից հայտնել էին, որ տեղեկություններ ունեն Գդանսկի համաժողովին չմասնակցելու Զելենսկու որոշման մասին՝ դիվանագիտական սկանդալի ֆոնին, որը կապված է ավելի վաղ Զելենսկուն Լեհաստանի ընտրված նախագահ Կարոլ Նավրոցկիի շնորհած պետական պարգևը չեղարկելու հետ։

Լեհաստանի կառավարությունում մինչև վերջին պահը հայտարարում էին, որ Զելենսկու՝ ուղևորությունից հրաժարվելու վերաբերյալ ազդակներ չեն ստացել։

Երկու երկրների միջև առճակատման առիթ է դարձել ուկրաինական ստորաբաժանումներից մեկին Ուկրաինական ապստամբական բանակին առնչվող անուն շնորհելը։

Ուկրաինական ապստամբական բանակը կապված է 1943–1944 թվականների Վոլինյան կոտորածի իրադարձությունների հետ, որի ընթացքում, պատմաբանների գնահատականներով, զոհվել են տասնյակ հազարավոր լեհ խաղաղ բնակիչներ։ Հենց այդ իրադարձությունների հիշողությունն էլ մնում է լեհ-ուկրաինական հարաբերությունների ամենացավոտ թեմաներից մեկը։

Հետևեք մեզ՝ այստեղ