Ռեկորդային տեղումներ Հայաստանում. Սևանա լճի մակարդակը այսօր ամենաբարձրն է վերջին 10 տարվա համեմատ

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

2026 թվականի գարունն ու հունիս ամիսը Հայաստանում աչքի են ընկել կլիմայական բացառիկ պայմաններով։ Ըստ մասնագետների՝ սա վերջին տասնամյակների ամենախոնավ շրջաններից մեկն էր, որն էապես փոխել է երկրի ջրային պաշարների պատկերը։

«Այս տարվա գարունը 1935 թվականից ի վեր դիտարկված 12-րդ ամենախոնավ գարունն էր։ Տեղումների քանակը կազմել է 260 մմ, ինչը նորմայի 131%-ն է։ Հատկապես առանձնացել է մարտ ամիսը, որը Հայաստանի դիտարկումների ողջ պատմության ընթացքում եղել է ամենատեղումնառատը»,-մամուլի ասուլիսին ասաց Շրջակա միջավայրի նախարարության «Հայհիդրոմետ» ՊՈԱԿ-ի տնօրեն Լևոն Ազիզյանը։

Բարձր լեռնային գոտիներում գրանցվել են ձնածածկույթի ռեկորդային ցուցանիշներ։ Մարտի 28-ին Արագած բարձր լեռնային օդերևութաբանական կայանում ձյան շերտի բարձրությունը հասել է 324 սմ-ի, որը ռեկորդային ցուցանիշ է այդ կայանի դիտարկումների ողջ պատմության ընթացքում։

Առատ տեղումների շնորհիվ գետերի հոսքի ծավալները զգալիորեն գերազանցել են նորման (130-150%)։ Սա թույլ է տվել գրեթե ամբողջությամբ լցնել հանրապետության խոշոր ջրամբարները։ Հունիսի 24-ի դրությամբ՝ հինգ խոշոր ջրամբարների ընդհանուր ծավալը կազմում է 826 միլիոն խորանարդ մետր, ինչը 192 միլիոնով ավելի է նախորդ տարվա ցուցանիշից։ Ախուրյանի ջրամբարը լցված է 105%-ով, Ապարանը՝ 101%-ով, իսկ Ազատը՝ 100%-ով։

Սևանա լճի համար այս տարին նույնպես ջրառատ է։

«Այսօրվա դրությամբ Սևանա լճի մակարդակը կազմում է 1900.73 մետր, որը վերջին 10 տարիների ամենաբարձր ցուցանիշն է»,-ասաց Լևոն Ազիզյանը։

Հետևեք մեզ՝ այստեղ