Ֆլորիդայի իշխանությունները փակել են ներգաղթյալների պահման «Ալիգատոր Ալկատրաս» կենտրոնը

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին 

Ամերիկյան Ֆլորիդա նահանգի նահանգապետ Ռոն Դեսանտիսը հայտարարել է Էվերգլեյդսի ճահճային տարածքում գտնվող հեռավոր օդանավակայանում տեղակայված «Ալիգատոր Ալկատրաս» միգրացիոն պահման կենտրոնի փակման մասին, հաղորդում է Associated Press գործակալությունը։

Հաստատությունը դադարեցրել է իր աշխատանքը բացվելուց ավելի քան մեկ տարի անց։

Դեսանտիսը նշել է, որ կենտրոնն ի սկզբանե դիտարկվում էր որպես ժամանակավոր լուծում՝ մինչև ձերբակալված ներգաղթյալների տեղավորման համար ավելի մշտական օբյեկտների հայտնվելը։ Այժմ դաշնային իշխանությունները տիրապետում են բավարար հզորությունների՝ նրանց պահելու համար։

«Այն կատարեց իր խնդիրը»,- մամուլի ասուլիսի ժամանակ հայտարարել է նահանգապետը։

Հունիսի սկզբին իշխանություններն արդեն հայտարարել էին հաստատության ժամանակավոր փակման մասին և այնտեղ պահվող բոլոր մարդկանց տեղափոխել այլ կենտրոններ։ Որպես պաշտոնական պատճառ նշվել էր փոթորիկների սեզոնի սկիզբը, որի պատճառով Էվերգլեյդսում մարդկանց գտնվելը համարվել էր ոչ անվտանգ։

Կենտրոնը ստեղծել էր Դեսանտիսի վարչակազմը 2025 թվականին՝ ընդամենը մի քանի օրվա ընթացքում։ Նահանգապետը և ԱՄՆ նախագահ Դոնալդ Թրամփը հաստատությունն անվանում էին անօրինական ներգաղթյալների արտաքսման քաղաքականության կարևոր տարր։

Նահանգի իշխանությունների տվյալներով՝ կենտրոնով անցել է շուրջ 21 հազար մարդ, որոնք հետագայում արտաքսվել են ԱՄՆ-ից։

Միաժամանակ, իրավապաշտպան կազմակերպությունները և ներգաղթյալների փաստաբանները բազմիցս քննադատել են հաստատությունում պահման պայմանները։

Ձերբակալվածները դժգոհում էին փաստաբանների հասանելիության դժվարություններից, հակասանիտարական վիճակից, միջատներից, կոյուղու հետ կապված խնդիրներից և սննդի որակից։ Հաղորդվում էր նաև կեղտաջրերով հեղեղված սենյակների և մոծակների մեծ քանակության մասին։

Ներգաղթյալների իրավունքների պաշտպանության կազմակերպությունների ներկայացուցիչները հայտարարել են, որ կենտրոնի փակումը չի լուծում մարդկանց երկարատև կալանքի տակ պահելու խնդիրը։

Նրանց կարծիքով՝ նախագծից հիմնական օգուտը ստացել են կապալառուներն ու մասնավոր ընկերությունները, որոնք միլիոնավոր դոլարներ են վաստակել դրա սպասարկման վրա։

Ընդ որում, Դեսանտիսը նշել է, որ Էվերգլեյդսի օդանավակայանը, որի շուրջ կառուցվել էր կենտրոնը, կշարունակի օգտագործվել նաև օբյեկտի փակումից հետո։

Հետևեք մեզ՝ այստեղ