Սա այն իշխանությունն է, որը չի խղճում ոչ մեկին, այդ թվում՝ սեփական թիմի ներկայացուցիչներին. Սրբուհի Գալյան

Հարցը, որ տալիս եք՝ ինչո՞ւ են միայն ընդդիմության հետ կապված քրեական գործեր հարուցվում, ինքնին հարց առաջացնող է: Պարզ չէ՞ պատասխանը, որովհետև ընդդիմությունը համատարած ընտրակաշառք է բաժանում։ Այս մասին Սահմանադրական դատարանի բակում, լրագրողների հետ զրույցում ասել է Արդարադատության նախարար Սրբուհի Գալյանը:

Լրագրողի հարցին՝ եթե լսեին «Քաղաքացիական պայմանագիր» կուսակցության ներկայացուցիչների հեռախոսազանգերը, ըստ Գալյանի, ի՞նչ կլսեին, նա պատասխանել է՝ ի՞նչ գիտեք, որ չեն լսել:

«Երևույթը, որին մենք ականատես ենք եղել, այսպես ասած, տեղի է ունեցել ընդդիմության ջանքերով։ Ասում եք՝ ինչո՞ւ ոչ մի իշխող կուսակցության ներկայացուցիչ չկա, որն անցնում է, օրինակ՝ ընտրակաշառքի գործով, գուցե չկա ընտրակաշառք բաժանող: Վստահաբար չկա, թե չէ կլիներ, որովհետև այս իշխանության օրոք, գործող պաշտոն զբաղեցնող անձինք զրկվել են իրենց պաշտոնից ու տեղափոխվել են քրեակատարողական հիմնարկ՝ պատիժ կրելու կամ կալանավորվել են:

Սա այն իշխանությունն է, որը չի խղճում ոչ մեկին, այդ թվում՝ սեփական թիմի ներկայացուցիչներին: Արդեն իրոք հերիք է, հերիք է ցույց տալ, որ մենք ապրում ենք այլ իրականությունում, սա է մեր իրականությունը: Սա մի իրականություն է, որտեղ ընդիմությունը բաժանել է կաշառք, դրա վերաբերյալ կան բազմաթիվ պնդումներ, քրեական գործեր: Կհաստատվեն դեպքերը, թե ոչ, կերևա դատարանում»,-նշել է Արդարադատության նախարարը: