Համաշխարհային տնտեսությանը սպառնում են ռեկորդային պարտքերը, գնաճը և արհեստական բանականության բումը. BIS

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Միջազգային հաշվարկների բանկը (BIS) իր տարեկան զեկույցում նախազգուշացրել է համաշխարհային տնտեսության համար ռիսկերի աճի մասին՝ պետական պարտքի ռեկորդային աճի, պահպանվող գնաճի, ֆինանսական անհավասարակշռությունների և արհեստական բանականության տեխնոլոգիաների սրընթաց զարգացման ֆոնին։ Զեկույցի արդյունքներին ծանոթացել է «Коммерсантъ» պարբերականը։

Փաստաթղթում վերլուծաբաններն առանձնացրել են չորս հիմնական գործոն, որոնք կարող են բացասական ազդեցություն ունենալ համաշխարհային տնտեսության վրա։

Դրանցից առաջինը պահպանվող բարձր գնաճն է։ BIS-ի գնահատմամբ, մատակարարման գլոբալ շղթաներում խափանումները շարունակում են պահպանել բարձր գնաճային սպասումները բիզնեսի և սպառողների շրջանում։ Միևնույն ժամանակ փորձագետները դրական են գնահատել ԱՄՆ-ի և Իրանի միջև համաձայնությունը և Հորմուզի նեղուցով նավարկության վերականգնումը՝ նշելով, որ դա նվազեցնում է համաշխարհային տնտեսության համար առավել բացասական սցենարների հավանականությունը։

Անորոշության երկրորդ աղբյուրը դարձել է արհեստական բանականության մեջ ներդրումների սրընթաց աճը։ BIS-ը նախազգուշացնում է, որ ռիսկերը կապված են ինչպես շուկայի հնարավոր գերտաքացման և ԱԲ-ում չափազանց մեծ ներդրումների, այնպես էլ նոր տեխնոլոգիաների՝ աշխատաշուկայի վրա հնարավոր ազդեցության հետ։

Անհանգստության ևս մեկ պատճառ վերլուծաբանները համարում են ֆինանսական խոցելիությունները, որոնք կապված են ակտիվների ուռճացված արժեքի և արհեստական բանականության ոլորտում նախագծերի ֆինանսավորման համար փոխառու միջոցների ակտիվ օգտագործման հետ։

Չորրորդ գործոնը շարունակում է մնալ պետական պարտքի շարունակվող աճը բազմաթիվ երկրներում։ Զեկույցում ընդգծվում է, որ դա ստեղծում է նոր փոխկապակցվածություն պետական ինքնիշխանության և ֆինանսական կայունության միջև։ Այս կապակցությամբ Միջազգային հաշվարկների բանկը կոչ է արել կառավարություններին վարել ավելի կարգապահ բյուջետային քաղաքականություն՝ ուղղված պարտքային բեռի կրճատմանը, գնաճի զսպմանը և ֆինանսական կայունության ամրապնդմանը։

Հետևեք մեզ՝ այստեղ