26-ամյա տղամարդը կոմայի մեջ ընկնելուց հետո տեսել է իր ապագան

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Բրիտանացի 26-ամյա Քինան Ակտոնը պատմել է, որ բժշկական կոմայի ընթացքում, իր խոսքով, տեսել է իր ապագան, հայտնում է  Past.am-ը հղում անելով Daily Mirror-ին։

2024 թվականի հոկտեմբերին Ակտոնը ֆիթնեսի միջոցառման ժամանակ հանկարծակի կորցրել է գիտակցությունը։ Նրա մոտ զարգացել են բազմաօրգանային անբավարարություն և գլխուղեղի այտուց։ Հետագայում բժիշկները նրա մոտ ախտորոշել են ռաբդոմիոլիզ՝ ծանր վիճակ, որը կարող է առաջանալ չափազանց ինտենսիվ ֆիզիկական ծանրաբեռնվածության հետևանքով։ Բժիշկները նրան տեղափոխել են բժշկական արհեստական կոմայի վիճակ։

Ակտոնի խոսքով՝ կոմայի ընթացքում նա տեսել է, թե ինչպես է ապրում լճի ափին գտնվող տանը՝ կնոջ և երկվորյակ երեխաների հետ։

Երբ բժիշկները փորձել են նրան դուրս բերել կոմայից, նրա մոտ սրտի կանգ է գրանցվել, և նա կրկին հայտնվել է կոմայի մեջ։ Նրա խոսքով՝ երկրորդ տեսիլքի ընթացքում ինքը հայտնվել է փոքրիկ տնակում, որտեղ եղել է վազքուղի։

«Որքան շատ էի վազում, այնքան ավելի շատ ժամանակ էր ինձ տրվում ապրելու։ Ձեռքիս Garmin ժամացույց կար, որը հետհաշվարկ էր կատարում՝ ցույց տալով ութ օր», - պատմել է նա։

Արթնանալուց հետո Ակտոնը պարզել է, որ ընդհանուր առմամբ կոմայի մեջ անցկացրել էր ուղիղ ութ օր։

Ապաքինումից հետո նա ամուսնացել է իր սիրելիի հետ։ Զույգը սպասում էր երեխայի, իսկ հերթական ուլտրաձայնային հետազոտության ժամանակ պարզվել է, որ կինը հղի է երկվորյակներով։

«Կարծում եմ՝ չափազանց շատ զուգադիպություններ կան, որպեսզի չհավատամ, որ դա ապագայի տեսիլք էր։ Դա պետք է անձամբ զգաս, որպեսզի հավատաս», - ասել է Ակտոնը։

Նրա պատմությունը լայն արձագանք է ստացել սոցիալական ցանցերում, սակայն ներկայացվածը հիմնված է բացառապես տղամարդու անձնական վկայության վրա և չունի գիտական հաստատում։

Հետևեք մեզ՝ այստեղ