Օսկարակիր դերասան Էնթոնի Հոփքինսը թողարկել է իր դեբյուտային սինգլը` 88 տարեկանում

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Բրիտանացի դերասան Էնթոնի Հոփքինսը թողարկել է իր դեբյուտային սինգլը՝ «Bracken Road» անունը կրող դասական ստեղծագործությունը։ Այն պետք է ընդգրկվի օգոստոսի 21-ին նախատեսված «Life Is a Dream» ալբոմում, հայտնում է The Guardian-ը:

Սկավառակը բաղկացած կլինի 12 ստեղծագործություններից, որոնք ամերիկյան «Օսկար» կինոմրցանակի կրկնակի դափնեկիրը ստեղծել է վերջին 60 տարվա ընթացքում։ Ձայնասկավառակը ձայնագրվել է Լոնդոնի ֆիլհարմոնիկ նվագախմբի կողմից՝ վենեսուելացի դիրիժոր Գուստավո Դուդամելի ղեկավարությամբ։

«Երաժշտությունը իմ առաջին ցանկությունն էր, առաջին կիրքը, և ես երաժշտություն եմ գրել իմ ողջ կյանքի ընթացքում։ Այս ստեղծագործություններից մի քանիսը ինձ հետ են եղել տասնամյակներ շարունակ, և ես մինչ օրս վերադառնում եմ դրանց», - ասվում է 88-ամյա Հոփքինսի հայտարարության մեջ։

Համաշխարհային ճանաչում ունեցող դերասանը, որը ծնվել է 1937 թվականին ուելսյան Պորտ Թոլբոտ քաղաքում, սկսել է դաշնամուր նվագել չորս տարեկանում, իմպրովիզացիաներ անել վեց տարեկանում, իսկ պատանեկության տարիներին երաժշտություն էր գրում տեղի թատերական բեմադրությունների համար։

Հասանելի դարձած ստեղծագործությունը, որի ամբողջական անվանումն է «1947. Սյուիտ դաշնամուրի և նվագախմբի համար. II. «Bracken Road»», ստեղծվել է 1963 թվականին, երբ Հոփքինսը աշխատում էր Լիվերպուլի թատրոնում։ Այն ոգեշնչված է մանկության հիշողություններից, Ուելսի փողոցներից, դաշտերից, ֆերմաներից և լեռներից։ Հեղինակն այն անվանել է նվիրում անգլիացի կոմպոզիտոր Էդվարդ Էլգարի Առաջին սիմֆոնիային։

1992 թվականին Հոփքինսն արժանացել է «Օսկարի» «Գառների լռությունը» (The Silence of the Lambs, 1991) ֆիլմում պրոֆեսոր Հաննիբալ Լեկտերի դերակատարման համար։ Լեկտերի տարբերակիչ գիծը դասական երաժշտության հանդեպ ունեցած կիրքն է. պրոֆեսորը լսում է Յոհան Սեբաստիան Բախի «Գոլդբերգ-վարիացիաները»։

Հետևեք մեզ՝ այստեղ