Չինաստանում զբոսանավի խորտակման զոհերի թիվը հասել է 26-ի

Չինաստանի Հուբեյի նահանգում Յանցզի գետում «Արևելյան աստղ» զբոսանավի խորտակման զոհերի թիվը հասել է 26-ի, տեղեկացնում է «Արմենպրես»-ը՝ հղում անելով CCTV տեղական հեռուստաալիքին:

«Հունիսի 3-ի տեղական ժամանակով ժամը 18:00-ի (Երևանի ժամանակով ժամը 14:00-ի) տվյալներով՝ հունիսի 1-ին «Արևելյան աստղի» խորտակման հետևանքով զոհվել է 26 մարդ, փրկվել է 14 հոգի, փրկարար աշխատանքները շարունակվում են»,- ասված է Twiter-ում հեռոստաալիքի միկրոբլոգում:

Ավելի վաղ հաղորդվել էր 14 զոհվածների մասին:

Նավի խորտակման վայրում շարունակվում է ընդգրկուն որոնողա-փրկարարական գործողությունը, որին մասնակցում է շուրջ 4 հազար մարդ և 110 նավ: Ներկայումս պատահարի վայրում աշխատում է 180 ջրասուզակ: Բացի այդ, օդից ողբերգության վայրի նկատմամբ դիտարկում իրականացնելու համար ուղարկվել է հինգ ուղղաթիռ և Իլ-76 փոխադրական ինքնաթիռ:Գործողությունն իր հսկողության տակ է առել ՉԺՀ-ի վարչապետ Լի Կեցյանը: Նա կոչ է արել առավելագույն ջանքեր գործադրել մարդկանց փրկելու համար, ինչպես նաև անցկացնել նավաբեկության պատճառների «թափանցիկ» հետաքննություն, որն արդեն անվանել են Չինաստանում ամենաահավորը վերջին 70 տարվա ընթացքում:

Նավը խորտակվել է հունիսի 1-ին՝ տեղական ժամանակով ժամը 21:28-ին (Երևանի ժամանակով ժամը 17:28-ին): Այն Նանկինից ուղևորվում էր Չունցին: Նավի վրա եղել է 458 մարդ, ներառյալ 406 ուղևոր, անձնակազմի 47 անդամ և տուրիստական գործակալությունների 5 աշխատակից: Նավապետը և գլխավոր ինժեները հայտնել են, որ խորտակումից առաջ նավը ենթարկվել է ցիկլոնի հարվածին: Պատահածից հետո նավապետն ու ինժեները ձերբակալվել են ու հարցաքննվել:

Ինչպես հայտնել են փրկված ուղևորները, նավի խորտակումը տեղի է ունեցել 30-60 վայրկյանի ընթացքում: Մարդկանց մեծամասնությունը չի հասցրել օգտվել փրկարար միջոցներից: Չինաստանի իշխանությունները հրապարակել են խորտակված նավի ուղևորների ու անձնակազմի անդամների ամբողջական ցուցակը:

Ուղևորների մեծամասնությունը 60-ից մինչև 80 տարեկան թոշակառուներ են:

«Արևելքի աստղը» ոչ մեծ զբոսանավ է՝ 2,2 տոննա ջրատարողությամբ: Դրա երկարությունը 76,5 մետր է, բարձրությունը՝ 11 մետր: Այն պատկանում է Chongqing Eastern Shipping Corporation ընկերությանը, հաղորդել է ՌԻԱ Նովոստին: