ԱՄՆ ռազմածովային ուժերը Իրանի մերձակայքում կենտրոնացրել են 17 ռազմանավ

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

ԱՄՆ ռազմածովային ուժերը ներկայում Արաբական ծովում տեղակայել են 17 ռազմանավից բաղկացած խմբավորում, որը կարող է ներգրավվել Իրանի դեմ լայնածավալ հարվածների դեպքում։ Այդ մասին վկայում են ԱՄՆ Ռազմածովային ինստիտուտի տեղեկատվական ծառայության տվյալները։

Տարածաշրջանում տեղակայված են երկու միջուկային ավիակիրներ՝ USS Abraham Lincoln-ը և USS George H. W. Bush-ը, որոնց վրա տեղակայված են ավելի քան 100 մարտական ինքնաթիռ։

ԱՄՆ զինված ուժերի Կենտրոնական հրամանատարության (CENTCOM) տրամադրության տակ կա նաև մեկ հրթիռային հածանավ և 11 կործանիչ՝ զինված մինչև 1600 կիլոմետր հեռահարությամբ Tomahawk թևավոր հրթիռներով։

Խմբավորման կազմում ընդգրկված են նաև երեք խոշոր դեսանտային նավ, որոնց վրա տեղակայված են ծովային հետևակի էքսպեդիցիոն գումարտակ, ուղղահայաց թռիչք և վայրէջք իրականացնող կործանիչներ, կրակային աջակցության և տրանսպորտային ուղղաթիռներ, ինչպես նաև դեսանտային նավակներ։

Մարտական հերթապահություն են իրականացնում նաև մի քանի հարվածային սուզանավեր, որոնք նույնպես զինված են Tomahawk թևավոր հրթիռներով։

Բացի այդ, CENTCOM-ի տրամադրության տակ են գտնվում ևս երեք հրթիռային կործանիչ Հնդկական օվկիանոսում և մեկը՝ Կարմիր ծովում։

Կենտրոնական հրամանատարության տվյալներով՝ մինչև անցած ուրբաթ խմբավորման նավերն ու ավիացիան երկու շաբաթ շարունակ ամեն օր հարվածներ են հասցրել Իրանին։

Միևնույն ժամանակ, ԱՄՆ նախագահ Դոնալդ Թրամփը Axios-ին տված հարցազրույցում հայտարարել է, որ եթե ներկայիս բանակցությունները արդյունք չտան, ամերիկյան զինված ուժերը կրկին կհարվածեն Իրանին։

«Մենք շատ լուրջ բանակցություններ ենք վարում Իրանի հետ։ Եթե դրանք չհաջողվեն, կվերադառնանք շատ հզոր ռազմական գործողություններին», – ասել է Թրամփը։

Հարցին, թե որքան ժամանակ է պատրաստ տրամադրել դիվանագիտությանը, նա պատասխանել է. «Քիչ ժամանակ։ Կամ ամեն ինչ արագ կլինի, կամ ընդհանրապես չի լինի»։

Թրամփը նաև հիշեցրել է, որ ուրբաթ օրը հրահանգել էր ժամանակավորապես դադարեցնել Իրանի դեմ հարվածները, քանի որ Վաշինգտոնի և Թեհրանի միջև միջնորդ երկրները խնդրել էին դիվանագիտությանը ևս մեկ հնարավորություն տալ։

«Ոչինչ չստացանք և ոչինչ էլ չկորցրինք», – ասել է ԱՄՆ նախագահը՝ բացատրելով, թե ինչու է համաձայնել միջնորդների կոչերին։

Հետևեք մեզ՝ այստեղ