Կոտայքում մեկ օրում չորս մարդու կյանք խլած Թադևոս Հովակիմյանը կրկին անմեղսունակ է ճանաչվել

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Կոտայքում մեկ օրում չորս մարդու կյանք խլած Թադևոս Հովակիմյանը, ով 15 տարի որսորդմիության անդամ է եղել և զենք ձեռք բերել, կրկին անմեղսունակ է ճանաչվել։ Կրկնակի փորձաքննության արդյունքում այդպես էլ ոչինչ չի փոխվել։ Այժմ Հովակիմյանի նկատմամբ որպես խափանման միջոց կիրառված է բժշկական հսկողությունը։ Այս մասին գրում է Փաստինֆոն։

«Սպանված ամուսինների որդու՝ Էրիկ Ղազարյանի ներկայացուցիչ Գոռ Ալոյանը «Փաստինֆո»-ի հետ զրույցում նշեց, որ մարդը չի ծնվում անմեղսունակ, այլ ինչ-որ փուլում է դառնում այդպիսին։

«Այժմ գործ ունենք իրավիճակի հետ, որ մարդն առողջ վիճակից ինչ-որ ընթացքից է վերափոխվել անմեղսունակի, ընդ որում՝ արարքի նկատմամբ»,- նշեց նա։

Քրեական գործն արդեն մի քանի ամիս է՝ Կոտայքի մարզի ընդհանուր իրավասության դատարանի դատավոր Գագիկ Հարությունյանի վարույթում է՝ հիմնական դատալսումների փուլում։ Առաջիկա դատական նիստում կհարցաքննվեն վկաները։

Անդրադառնալով անբարյացակամ փոխհարաբերություններին, մեղադրյալի պնդմամբ՝ թշնամանքի առկայությանը՝ Ալոյանը նշեց, որ նման հարաբերություններ եղել են ոչ միայն իր ընկալմամբ։ Ըստ մեղադրյալի՝ ընդամենը ավելի խորը «թշնամանք» է եղել, սակայն անբարյացակամ հարաբերություններ բոլորի ընկալմամբ են եղել։ Նա անհաշտ է եղել հարևանների հետ, խնդրահարույց մարդ է եղել։

Ճշգրտող հարցին՝ մեղադրյալի նկատմամբ վատ վերաբերմունք եղե՞լ է, Ալոյանը նշեց, որ Հովակիմյանը, նախագահողի հարցին ի պատասխան, թե իրեն մեղավոր ճանաչո՞ւմ է, ասել է, որ գործողություններն ինքն է արել, բայց ամուսիններին սպանել է, որովհետև իր հետ թշնամություն են ունեցել և փորձել են նվաստացնել։

«Իր մոտ այդպիսի տպավորություններ կային, բնականաբար, դրանք, ըստ տուժող կողմի, իրականությանը չեն համապատասխանում, բայց այդ մարդու մոտ ինչ-որ նման նստվածքներ, ճշմարտություններ կային ամրագրված՝ ըստ իրեն։ Ամեն դեպքում նա այդպես պատասխանեց, ըստ իրեն՝ ինքն ունեցել է թշնամական հարաբերություններ»,- նշեց Ալոյանը։

Ինչ վերաբերում է մեղադրյալի քաղաքական հայացքներին, ՔՊ-ին աջակցելուն և այն հարցին, թե հնարավո՞ր է՝ այդ հանգամանքով պայմանավորված փորձեն «ծածկադմփոց» անել, Ալոյանը դա բացառեց։ Նա նշեց, որ որպես տուժողի ներկայացուցիչ նման բան երբեք չի նկատել, իսկ դատարանում նրան տեսնելուց հետո նման կասկածները կհօդս ցնդեն։

«Սովորական գյուղի բնակիչ է, վատ սոցիալական պայմաններում ապրած։ Այդ մարդուն, որ տեսնեք, որևէ մեկ անձ չի գալիս իր հետևից, կինն անձամբ նույնիսկ չկա, մեկ մարդ անգամ չի գալիս։ Ինչ-որ երանգներ տալն արդար չէ»,- ասաց նա։

Հիշեցնենք, որ Կոտայքի մարզում դեպքը տեղի է ունեցել 2025 թվականի հոկտեմբերի 12-ին։ Տղամարդը նախ սպանել էր Արամուսի դաշտերում գազար հավաքող ամուսիններին, որոնց գտնվելու վայրը պարզել էր հեռախոսազանգի միջոցով, ապա սպանել նաև մյուս զույգին։

Ընդ որում՝ տուժողներից մեկը բնակվում էր արտերկրում և վերջերս էր եկել Հայաստան, իսկ դեպքի օրը ծանոթի հետ գնացել էր բնության գրկում հանգստի։

«Փաստինֆո»-ի տեղեկություններով՝ սպանություններից հետո Հովակիմյանը գնացել էր քեռու տուն, որտեղ էլ պատմել էր իր «հերոսությունների» մասին։ Ավելին՝ քաջատեղյակ աղբյուրները հայտնում են, որ նրա մոտ եղել է ցուցակ, որտեղ ընդգրկված են եղել այն անձինք, որոնց սպանությունը նա նպատակադրված էր իրականացնել։

60-ամյա տղամարդը ձերբակալվել էր և տվել խոստովանական ցուցմունք, իսկ նրան պատկանող ողորկափող հրացանը հայտնաբերվել էր ավտոմեքենայում։

Նրա նկատմամբ հարուցվել է հանրային քրեական հետապնդում՝ Քրեական օրենսգրքի 155-րդ հոդվածի 1-ին մասով (սպանություն)՝ 2 դրվագով, 155-րդ հոդվածի 2-րդ մասի 10-րդ և 13-րդ կետերով (շահադիտական դրդումներով, այլ հանցանքը թաքցնելու կամ դրա կատարումը հեշտացնելու նպատակով կատարված սպանություն)՝ 2 դրվագով, ինչպես նաև 252-րդ հոդվածի 2-րդ մասի 5-րդ և 7-րդ կետերով (զենքի կամ մարմնական վնասվածք պատճառելու համար նախապես պատրաստված կամ հարմարեցված առարկայի կամ միջոցի գործադրմամբ, խոշոր չափերով կատարված ավազակություն)»,-գրում է կայքը։

Հետևեք մեզ՝ այստեղ