Առանձնապես խոշոր չափերով թմրամիջոցների ապօրինի շրջանառության վերաբերյալ քրեական վարույթի նախաքննությունն ավարտվել է. 2 անձ՝ կալանավորվել

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

ՀՀ քննչական կոմիտեի հատկապես կարևոր գործերի քննության գլխավոր վարչությունում ավարտվել է իրացնելու նպատակով առանձնապես խոշոր չափերով թմրամիջոցների ապօրինի շրջանառության հերթական դեպքի վերաբերյալ քրեական վարույթի նախաքննությունը:

Նախաքննության ընթացքում կատարված քննչական և վարութային գործողությունների, ինչպես նաև ՀՀ ԱԱԾ և ՀՀ ՊԵԿ աշխատակիցների կողմից իրականացված օպերատիվ-հետախուզական միջոցառումների արդյունքում առերևույթ փաստական տվյալներ են ձեռք բերվել այն մասին, որ Ռ.Ք.-ն օտարազգի քաղաքացու հետ նախնական համաձայնությամբ, խմբի կազմում, շահադիտական դրդումներով, 2026 թվականի հունվարի 17-ից մինչև ապրիլի 12-ն ընկած ժամանակահատվածում, ձեռք են բերել «Մեթադոն» և «Մարիխուանա» տեսակների թմրամիջոցներ և սահմանելով թմրամիջոցների իրացման գները` ձեռնամուխ են եղել դրանք այլ անձանց իրացնելուն:

Բացի այդ, օտարազգի երկու քաղաքացիները ներգրավված լինելով ապօրինի թմրամիջոցների միջազգային շրջանառության շղթայի մեջ, նախնական համաձայնությամբ, խմբի կազմում մաքսանենգությամբ ՀՀ են տեղափոխել առանձնապես խոշոր չափերով «Մարիխուանա» տեսակի թմրամիջոց, որից հետո, օտարազգի քաղաքացիները 2026 թվականի ապրիլի 29-ին Երևանի Արին Բերդ փողոցում գործող ավտոպահեստամասերի շուկայի հարակից տարածքում ստացել են վերը նշված թմրամիջոցը, սակայն իրենց կամքից անկախ հանգամանքներում չեն կարողացել հանցագործությունն ավարտին հասցնել, քանի որ ձերբակալվել են:

ՀՀ քաղաքացու նկատմամբ հսկող դատախազի որոշմամբ հարուցվել է հանրային քրեական հետապնդում՝ Քրեական օրենսգրքի 393-րդ հոդվածի 2-րդ մասի 1-ին և 2-րդ կետերով (թմրամիջոցների ապօրինի շրջանառությունն իրացնելու նպատակով կամ դրանք ապօրինի իրացնելը), օտարազգի քաղաքացիներից մեկի նկատմամբ՝ 393-րդ հոդվածի 2-րդ մասի 1-ին և 2-րդ կետերով (թմրամիջոցների ապօրինի շրջանառությունն իրացնելու նպատակով կամ դրանք ապօրինի իրացնելը), 44-393-րդ հոդվածի 3-րդ մասի 2-րդ կետով (առանձնապես խոշոր չափերով թմրամիջոցների ապօրինի շրջանառությունն իրացնելու նպատակով կամ դրանք ապօրինի իրացնելու փորձը), 46-399-րդ հոդվածի 3-րդ մասի 2-րդ կետով (առանձնապես խոշոր չափերով թմրամիջոցների մաքսանենգության փորձը), մյուսի նկատմամբ՝ 399-րդ հոդվածի 3-րդ մասի 2-րդ կետով (առանձնապես խոշոր չափերով թմրամիջոցների մաքսանենգությունը) և 393-րդ հոդվածի 3-րդ մասի 2-րդ կետով (առանձնապես խոշոր չափերով թմրամիջոցների ապօրինի շրջանառությունն իրացնելու նպատակով կամ դրանք ապօրինի իրացնելը):

Նախաքննության շրջանակում երկուսը կալանավորվել են, մեկի նկատմամբ որպես խափանման միջոց կիրառվել է վարչական հսկողությունը:

Քրեական վարույթը մեղադրական եզրակացությամբ ուղարկվել է հսկող դատախազին:

Ծանուցում. հանցագործության համար մեղադրվողը համարվում է անմեղ, քանի դեռ նրա մեղավորությունն ապացուցված չէ Քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով։

Հետևեք մեզ՝ այստեղ