Երուսաղեմի հայկական թաղամասը՝ նոր լարվածության կենտրոնում

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Երուսաղեմի Հին քաղաքում հայկական ներկայության դեմ ուղղված միջադեպերը վերջին շաբաթներին կրկին հայտնվել են ուշադրության կենտրոնում։ Օգոստոսի 30-ին Իսրայելի ոստիկանությունը հայտնել է, որ Հին քաղաքում յոթ մարդ է ձերբակալվել կրոնական սրբավայրերի նկատմամբ ոտնձգությունների կասկածանքով։ Երեք չափահասներ կասկածվում են մահմեդական գերեզմանաքարը ոտքով հարվածելու և տապալելու մեջ, իսկ ևս չորսը՝ Հայոց Պատրիարքարանի համալիրի ուղղությամբ թքելու համար։ Բոլոր յոթը հետագայում ազատ են արձակվել սահմանափակումներով։

«Հայ առաքելական եկեղեցու և քրիստոնեության դեմ պայքարը, դժբախտաբար, չի սահմանափակվում միայն Հայաստանով։ Այստեղ՝ Երուսաղեմում, մենք ամենօրյա պայքարի մեջ ենք, սակայն չենք թուլանում, չենք հանձնվում։ Օգոստոսի 2-ին 6 կրոնական հրեաներ՝ հինգ անչափահաս և մեկ չափահաս, ձերբակալվել էին Սուրբ Հակոբյանց վանքի մուտքի մոտ թքելու, դարպասները հարվածելու և քարեր նետելու կասկածանքով։ Միջադեպի ժամանակ քարեր են նետվել նաև դեպքը տեսագրող հայ կնոջ ուղղությամբ»,- MediaHub-ին պատմեց երուսաղեմաբնակ Պետիկ Կիրակոսյանը։

Նրա խոսքով՝ հայկական թաղամասի նկատմամբ նման վերաբերմունքը տեղի է ունենում ավելի լայն խնդրի ֆոնին․ վերջին ամիսներին Երուսաղեմում արձանագրվել են քրիստոնյա հոգևորականների, եկեղեցիների և գերեզմանատների նկատմամբ թքելու, վիրավորելու, քարեր նետելու և ֆիզիկական հարձակումների դեպքեր։ Ապրիլին Իսրայելի ԱԳՆ-ն նույնիսկ հատուկ պաշտոն է ստեղծել քրիստոնեական աշխարհի հարցերով, որը ստանձնել է դիվանագետ Ջորջ Դիկը։

Երուսաղեմի հայկական թաղամասը միայն կրոնական տարածք չէ։ Հայերի ներկայությունը Երուսաղեմում ունի շուրջ 1600 տարվա շարունակական պատմություն։ Ներկայիս թաղամասի բնակիչների մի զգալի մասը Հայոց ցեղասպանությունից փրկվածների ժառանգներն են․ ցեղասպանությունից հետո Երուսաղեմ հասած շուրջ 10 հազար հայ փախստականների ժառանգները հետագայում բնակություն են հաստատել պատրիարքարանի տարածքում։

«Այս համատեքստում առանձնահատուկ նշանակություն ունի «Կովերի պարտեզը»։ Այն հայկական թաղամասի ամենախոշոր հողատարածքներից է՝ Սիոն լեռան հատվածում, և դրա ճակատագիրը դարձել է հայկական համայնքի գոյության ու տարածքային ամբողջականության առանցքային հարցերից մեկը։ Այս պահին էլ ես «Կովերու պարտեզում» եմ։ Փորձում ենք այն պաշտպանել ծայրահեղական հրեաներից։ Այսօր հայկական թաղամասի խնդիրը, հետևաբար, երկու զուգահեռ ճակատ ունի՝ անվտանգություն և հողային իրավունքներ։ Մի կողմից՝ հայկական եկեղեցու և հայ բնակիչների նկատմամբ շարունակվող ոտնձգությունները, մյուս կողմից՝ համայնքի համար ռազմավարական նշանակություն ունեցող հողերի ապագայի շուրջ դատական պայքարը»,- ասաց Կիրակոսյանը։

Հայկական թաղամասի հարցը համայնքի համար այլևս պարզապես անշարժ գույքի վեճ չէ․ այն կապված է Երուսաղեմում դարերով պահպանված հայկական ներկայության շարունակականության հետ։

Հունան Թադևոսյան

Հետևեք մեզ՝ այստեղ