Սիթքոմում կլինեն սյուժետային փոփոխություններ. «Խոպանի տեսության» սցենարի հեղինակը՝ սիթքոմի նոր եթերաշրջանի մասին

ՖՈՏՈ 22 Փետրվար, 2016 13:00

«Շանթ» հեռուստաընկերության «Խոպանի տեսություն» սիթքոմի երկրորդ եթերաշրջանը նոր անակնկալներով եւ նոր հերոսներով կմեկնարկի մարտի 5-ից: Այս մասին Life.panorama.am-ին հայտնեց սիթքոմի սցենարի հեղինակներից Խորեն Թեւանյանը.

«Ըստ նախնական պլանավորման՝ «Խոպանի տեսոթյան» երկրորդ եթերաշրջանը կմեկնարկի մարտի 5-ից և ամենայն հավանականությամբ ամեն ինչ պատրաստ կլինի, որպեսզի գարնան առաջին weekend-ից ուրախացնենք հեռուստադիտողին. ի դեպ` նոր էպիզոդները ինչպես նախորդ եթերաշրջանում եթերում կլինեն յուրաքանչյուր շաբաթ և կիրակի»,- նշեց սցենարի հեղինակը:

«Խոպանի տեսությունը» նոր եթերաշրջանում նոր հորոսներ է ունենալու. «Նախագծին են միացել Անդրանիկ Հարությունյանը և Իվետա Եդիգարյանը: Առաջինը մարմնավորելու է Աննայի (Անի Պետրոսյանի կերպարի) ամուսնու դերը, իսկ Իվետան` նրանց հարևանուհու: Ներողություն եմ խնդրում, կարծում եմ, կերպարների սյուժետային գծերի մասին թերևս սահմանափակվեմ այսքանով: Կարող եմ հավելել միայն, որ թե Անդրանիկը, թե Իվետան շատ ճկուն և օրգանիկ կերպարներ են «բռնել», ինչը թույլ է տալիս ենթադրել, որ երկրորդ եթերաշրջանն էլ ավելի կհետաքրքրանա»,- նկատեց Խորեն Թեւանյանն ու հավելեց, որ նախկինում գործող հերոսներից Աշոտի կերպարը խաղահրապարակում ավելի պասիվ կլինի.

«Նոր եթերաշրջանում մենք էկրանին առավել սակավ կտեսնենք Աշոտի կերպարին (Հակոբ Քիշմիրյան), ով, ըստ սյուժեի, գտնվում է խոպանում»:

Սցենարի հեղինակի խոսքերով՝ սիթքոմում կլինեն նաեւ սյուժետային փոփոխություններ.

«Հիմնական փոփոխությունն այն է, երկու տեգոր կանանց` Աննայի և Մարիետայի հակամարտությունը թևակոխել է նոր, վճռական փուլ, ինչի արդյունքում Աննան հենց իրենց շենքում բնակարան է վարձում և իր ընտանիքով առանձնանում է մեծ ընտանիքից»,- պատմեց նա:

Սցենարիստը հավելեց նաեւ, որ «Խոպանի տեսության» երկրորդ եթերաշրջանի նկարահանումներն արդեն սկսված են և ընթանում են շատ արհեստավարժ պայմաններում. «Չնայած նորեկներին՝ ողջ թիմը բավական խաղակցված տպավորություն է թողնում, ինչից կարելի է ենթադրել, որ բոլորիս բավական հետաքրքիր, գունեղ և իրադարձություններով լի եթերաշրջան է սպասվում»,- նշեց Խորենը:

Անդրադառնալով առաջին եթերաշրջաբնում «Խոպանի տեսության» շուրջ զարգացած քննադատություններին եւ հարցին, թե նոր եթերաշրջանում կկարողանա՞ն արդյոք խուսափել դրանցից, Խորեն Թեւանյանը պատասխանեց.

«Զերծ մնալով «մենք առողջ քննադատության կողմնակից են» կամ նմանօրինակ այլ եզրույթներից՝ ասեմ, որ այո, նախորդ եթերաշրջանում կային խոցելի տեղեր, բայց կային նաև փայլուն կետեր: Ինչևէ, ստեղծագործական խումբը, նախորդ եթերաշրջանը վերլուծելով, կատարել է անհրաժեշտ եզրահանգումներ և ամեն ինչ անում է, նոր եթերաշրջանն առավել անխոցելի դարձնելու համար: Ինչ մնում է քննադատություններից խուսափելուն, ապա դա կարծես անհնար է: Ամեն դեպքում մեծ դեր ունի նաև դիտանկյունն ու նախատրամադրվածությունը, եթե նստում ես էկրանի առջև քննադատելու, անպայման կգտնես քննադատելու բան, իսկ, եթե նստել ես հոգսերից կտրվելու և ծիծաղելու, անպայման կծիծաղես (հոգսերից կտրվելը չեմ երաշխավորում): Քանզի շատ անգամ հումորը փորձում ենք կառուցել սոցիալական, կարելի է ասել նաև ցավոտ թեմաների վրա: Օրինակ` էլէներգիայի թանկացումը կամ հարկային բեռը եւ այլն: Որքան էլ փորձես այդ թեմաներին անդրադառնալ սարկազմով կամ հեգնանքով, միևնույն է, լրջությունն առաջին պլանում է: Ինչեւէ՝ ամեն դեպքում Շանթ Հ/Ը-ն ամեն ինչ անում է իր հանդիսատեսին հավուր պատշաճի ներկայանալու և սպասելիքներն արդարացնելու համար»:

Հեղինակ՝ Անուշիկ Մելքոնյան