«Սրտի օլիգարխ» չունեցող Փաշինյանը, «մոռացված» հերքումն ու իրականությունը

Նիկոլ Փաշինյանի ընտանիքի և գործարար Նարեկ Նալբանդյանի բիզնես կապերի մասին խոսակցությունները կրկին ակտիվացել են։

Այսօր կառավարության նիստից հետո տեղի ունեցած ճեպազրույցի ընթացքում անդրադառնալով այս շահարկումներին՝ Փաշինյանը պնդեց, թե ինքը «սրտի օլիգարխ» չունի, իսկ նման խոսակցություններն իրենց արդեն դուրս են բերում տանելիության բոլոր սահմաններից։ Նա հայտարարեց, թե հանձնարարել է իրավապահ մարմիններին վարույթներ նախաձեռնել, և եթե ստացվեն ապացույցներ, որ որևէ գործարար փորձում է տպավորություն ստեղծել, թե կապ ունի իրենց ընտանիքի հետ, արձագանքը լինելու է անհամաչափ և դաժան։

Միևնույն ժամանակ, Փաշինյանն իր խոսքում զարմանք հայտնեց, որ ամեն անգամ նման հրապարակումներ լինելիս դրանք չեն հերքվում հենց Նարեկ Նալբանդյանի կողմից, ինչն իրենց, իր ձևակերպմամբ, ահավոր ձևով նյարդայնացնում է։

«Փաստ»-ը փորձեց ուսումնասիրել, թե արդյոք Նալբանդյանը հրապարակային հերքել է այդ լուրերը, թե ոչ, և մի շարք ապացույցներ գտավ, որոնք փաստում են, որ Փաշինյանի այս պնդումը չի համապատասխանում իրականությանը։ Դեռևս 2025 թվականի մայիսին «Հետք»-ին տված ծավալուն հարցազրույցում Նարեկ Նալբանդյանը հրապարակայնորեն հերքել էր այդ խոսակցությունները։

Գործարարը պարզորոշ նշել էր, որ Աննա Հակոբյանին ճանաչում է բացառապես մամուլի հրապարակումներից՝ որպես երկրի ղեկավարի տիկնոջ, և երբևէ որևէ առնչություն նրա հետ չի ունեցել։ Ինչ վերաբերում է Փաշինյանին, Նալբանդյանը պարզաբանել էր, որ նրա հետ առնչվել է ընդամենը երկու անգամ․ առաջինը՝ տարածաշրջանի ամենախոշոր համակցված կերերի գործարանի բացմանը, և երկրորդը՝ Ծաղկաձորում հյուրանոցային համալիրի բացման արարողությանը, որտեղ Նիկոլ Փաշինյանը ներկա է եղել որպես արարողակարգային հրավիրյալ։

Գործարարը ընդգծել էր, որ որևէ այլ կապ՝ ոչ անձնական, ոչ ընտանեկան և ոչ էլ բիզնես հետաքրքրությունների տեսքով, երբեք չի եղել։