Վահան Բաբայանը չի բացում փակագծերը և խոստանում է խոսել ավելի ուշ

 Ազգային ժողովի ԲՀԿ խմբակցության պատգամավոր Վահան Բաբայանն այս պահին չի ցանկանում բացել փակագծերը, թե ինչու է հրաժարվել ԲՀԿ մամուլի խոսնակի պարտականություններից, սակայն խոստանում է այդ մասին խոսել ավելի ուշ: Ազգային ժողովում լրագրողների հետ զրույցում Վահան Բաբայանը հրաժարվեց պատասխանել լրագրողների հարցին, թե պատրաստվո՞ւմ է լքել Բարգավաճ Հա յաստան կուսակցությունը: «Ես այս պահին չեմ պատրաստվում փակագծեր բացել, քանի որ դա վերաբերվում է մեր ներկուսակցական խնդիրներին, իսկ ես սովորություն չունեմ ներքին խոսակցությունները հրապարակային դարձնել: Իհարկե, եղել են պատճառներ, կան խնդիրներ, սակայն դրանց մասին մենք կխոսենք ավելի ուշ»,- «Արմենպրես»-ի հաղորդմամբ՝ նշեց Բաբայանը:

Հարցին՝ հնարավո՞ր է, որ նման որոշումը  պայմանավորված է խմբակցության ներսում կոալիցիա կազմելու շուրջ տարբեր կարծիքների հետ, Բաբայանը պատասխանեց. «Մենք շատ հարցերի շուրջ կարող ենք այս պահին վերլուծություններ անել, բայց փաստը մնում է փաստ՝ ես հրաժարվել եմ իրականացնել կուսակցական այդ պարտականությունը՝ ելնելով նրանից, որ ես չեմ ցանկանում արտահայտել կուսակցության պաշտոնական դիրքորոշումները: Ով որ կարող է դա իրականացնել, ես նրան մաղթում եմ  հաջողություն: Մնացած հարցերին կպատասխանեմ ավելի ուշ: Միայն կարող եմ ասել, որ իմ նման որոշման պատճառներից մեկն այն է եղել, որ այսուհետ ես հնարավորություն կունենամ ավելի ազատ արտահայտել իմ կարծիքը, որը կլինի ոչ թե կուսակցության, այլ պատգամավոր Վահան Բաբայանի դիրքորոշումը»:

Բաբայանը հրաժարվեց պատասխանել հարցին՝ պատրաստվո՞ւմ է առաջիկայում լքել կուսակցությունը: Լրագրողների հարցերին նա կարճ պատասխան տվեց. «Վերջ, ես այլևս չեմ խոսելու: Մանացած հարցերի մասին հետո կխոսենք»: