Ուկրաինան ռուսական մարզերի ուղղությամբ զանգվածային հարձակում է իրականացրել

Սեպտեմբերի 15-ի գիշերը Ուկրաինայի զինված ուժերը ռուսական մարզերի ուղղությամբ անօդաչու թռչող սարքերի և հրթիռների զանգվածային հարձակում են իրականացրել։

Սամարայի մարզը թիրախավորվել է ավելի քան 40 անօդաչու թռչող սարքով։ «Վնասվել են արդյունաբերական օբյեկտներից մեկը, ինչպես նաև մի քանի բնակելի շինություններ», - գրել է մարզպետ Վյաչեսլավ Ֆեդորիշչեւն իր Telegram-ալիքում՝ նշելով, որ զոհեր և տուժածներ չկան։

Ըստ ուկրաինական Exilenova+ մոնիտորինգային ալիքի՝ հարված է հասցվել Սիզրանի նավթավերամշակման գործարանին։ Հարձակումից հետո օբյեկտում բռնկվել են նավթամթերք պարունակող տարողությունները։ Ավելի վաղ՝ օգոստոսի 4-ին, անօդաչու թռչող սարքերը հարվածել էին «Ռոսնեֆտ»-ին պատկանող գործարանին։

Ռոստովի մարզում հրթիռային զանգվածային հարձակումից հետո գրանցվել են «գետնին բազմաթիվ հարվածներ» և մի քանի հրդեհ։ Մարզի ղեկավար Յուրի Սլյուսարի տվյալներով՝ վնասվել են երկու բազմաբնակարան և երեք մասնավոր տուն, ուսումնական հաստատություն, առևտրային շինություններ, գյուղատնտեսական պահեստներ, մթերային խանութ և Ozon-ի լոգիստիկ կենտրոն։ «Նախնական տվյալներով՝ զոհեր կամ տուժածներ չկան», - գրել է Սլյուսարը։ «Exilenova+»-ը նշել է, որ հրթիռային հարվածի թիրախներից մեկը եղել է Տագանրոգի Բերիևի անվան ավիացիոն գիտատեխնիկական համալիրը, որտեղ ռազմական ինքնաթիռները վերանորոգվում և արդիականացվում են։

Նախօրեին ԱՄՆ նախագահ Դոնալդ Թրամփը հայտարարել էր, որ Ուկրաինան և Ռուսաստանը պայմանավորվել են չհարվածել միմյանց էներգետիկ օբյեկտներին։ Ուկրաինայի ղեկավար Վլադիմիր Զելենսկին նշել է, որ Կիեւը պատրաստ է հրաժարվել ռուսական նավթավերամշակման գործարանների վրա հարձակումներից, եթե Ուկրաինայի գործընկերները կարողանան երաշխավորել երկրի էներգետիկ ենթակառուցվածքների վրա ռուսական հարվածների դադարեցումը։ Նրա խոսքով՝ նման ցանկացած պայմանավորվածություն պետք է լինի հուսալի և երկարաժամկետ։