Հանցավոր խումբը փորձել է Ադրբեջանի հասարակական և կրոնական գործիչների դեմ մահափորձեր կատարել

Ադրբեջանի պետանվտանգության ծառայության անցկացրած հակաահաբեկչական և քննչական գործողությունների ընթացքում բացահայտվել են Ադրբեջանի և օտարերկրյա քաղաքացիների մասնակցությամբ հանցավոր գործողություններ, որոնք կապված են գաղտնի հանցավոր գործունեության, ահաբեկչության նախապատրաստման և ահաբեկչության ֆինանսավորման հետ․ գրում են ադրբեջանական լրատվամիջոցները։

Գործողությունների ընթացքում պարզվել է, որ Վուգար Աբդուլլաևը, որը նախկինում դատապարտվել էր Ադրբեջանում ահաբեկչական խումբ համարվող «Սումգայիթ համայնքի» կազմում հանցավոր գործողություններ կատարելու համար, հանցավոր դավադրության մեջ է մտել Ադրբեջանի քաղաքացիներ Ջալալ Հաջիևի, Ջավիդ Ալիևի, Նիջաթ Ահմեդովի, Նազիմ Ալիևի, Իլքին Հասանզադեի և այլոց հետ՝ Ադրբեջանի հասարակական և կրոնական գործիչների դեմ մահափորձեր կատարելու համար։ Այս նպատակով անցկացված գաղտնի հանդիպումներն ու հեռախոսազրույցները ձայնագրվել և փաստաթղթավորվել են։

Անցկացված քննչական-օպերատիվ միջոցառումները պարզել են, որ հանցավոր կազմակերպության անդամները նախապես ընտրված Ադրբեջանի քաղաքացիների դեմ մահափորձեր կատարելու համար ուսումնասիրել են նրանց մշտական երթուղիները, հավաքել տեղեկատվություն և համաձայնել պլանավորված հանցավոր գործողությունները կատարելուց հետո փախչել արտասահմանյան հակամարտության գոտիներ։

Ավելին, հետաքննությունը պարզել է, որ հանցավոր կազմակերպության անդամ Ջալալ Հաջիևը, անմիջականորեն և արտասահմանում գտնվող Ադրբեջանի քաղաքացիներ Այխան Հուսեյնովի, Էլշան Ասկերովի, Ֆահրեդդին Իմանովի, Նաիլ Ռասուլովի, Էլգուն Իսմայիլովի և այլոց միջոցով, կազմակերպել է Ադրբեջանից դուրս կրոնական արմատականությամբ պայմանավորված զինված հակամարտություններին մասնակցող անձանց, այդ թվում՝ միջազգային ճանաչում ունեցող ահաբեկչական կազմակերպությունների ֆինանսավորումը՝ կրիպտոարժութային համակարգերի միջոցով։

Նշված անձանց կողմից ահաբեկչության ֆինանսավորման հետ կապված հանցագործությունների կատարման առնչությամբ ձեռք են բերվել բազմաթիվ հավաստի ապացույցներ՝ սոցցանցերում տեղադրված կեղծ հայտարարությունների միջոցով տարբեր կրոնական ծիսակատարությունների անցկացման պատրվակով հավաքագրված դրամական միջոցների աղբյուրի, ինչպես նաև դրամական փոխանցումների մեխանիզմների վերաբերյալ։

Այլ երկրների անվտանգության մարմինների և հատուկ ծառայությունների հետ համատեղ ջանքերի արդյունքում բացահայտվել է տարբեր երկրներում բնակվող և միջազգային ահաբեկչության ֆինանսավորմամբ զբաղվող անձանցից կազմված խոշոր հանցավոր կազմակերպություն։ 5 երկրում զուգահեռ անցկացված հակաահաբեկչական գործողությունների արդյունքում ձերբակալվել է խմբի ընդհանուր առմամբ 10 անդամ։