Արաղչին Ֆիդանի հետ հանդիպմանը․ Իրանը պատրաստ է համագործակցել հարևանների հետ՝ հանուն խաղաղության և անվտանգության վերականգնման

Իրանի արտաքին գործերի նախարար Աբաս Արաղչին Նյու Յորքում՝ ՄԱԿ-ի Գլխավոր ասամբլեայի 81-րդ նստաշրջանի շրջանակում, հանդիպել է իր թուրք գործընկեր Հաքան Ֆիդանի հետ։ Արտաքին քաղաքական գերատեսչությունների ղեկավարները քննարկել են երկկողմ հարաբերությունները, ինչպես նաև տարածաշրջանային և միջազգային վերջին զարգացումները, հաղորդում է Mehr-ը։

Արաղչին Ֆիդանին տեղեկացրել է տարածաշրջանում ստեղծված իրավիճակի և Թեհրանի դիրքորոշման մասին։ Ըստ Իրանի նախարարի, ներկայիս իրավիճակը, այդ թվում՝ Հորմուզի նեղուցի շրջանում անկայունությունը, ԱՄՆ-ի և Իսրայելի գործողությունների անմիջական հետևանքն է, որոնք, ինչպես պնդում է Թեհրանը, սկսվել են փետրվարի 28-ին և շարունակվում են տարբեր ձևերով։

Իրանի ԱԳ նախարարության ղեկավարը շնորհակալություն է հայտնել Թուրքիային տարածաշրջանում խաղաղության և անվտանգության ամրապնդմանն ուղղված դիվանագիտական ջանքերի համար։

Արաղչին նաև հայտարարել է, որ ԱՄՆ-ի կողմից իր պարտավորությունների խախտումը հանգեցրել է Իսլամաբադի փոխըմբռնման հուշագրի տապալմանը՝ դրա ստորագրումից երեք շաբաթ էլ չանցած։ Նրա համոզմամբ, դրա հետևանքներն ազդել են ոչ միայն տարածաշրջանի երկրների, այլև ամբողջ աշխարհի վրա։

Իրանի նախարարն ընդգծել է տարածաշրջանի բոլոր պետությունների համատեղ ջանքերի անհրաժեշտությունը՝ խաղաղությունն ու անվտանգությունը վերականգնելու համար։ Դրա կարևորագույն նախապայմանը նա անվանել է փոխադարձ վստահության ամրապնդումը և ամերիկյան ռազմական ու տնտեսական միջոցառումներին մասնակցությունից հրաժարվելը, որոնք Թեհրանը համարում է միջամտություն և անօրինական։

Արաղչին հայտարարել է, որ Իրանը պատրաստ է համագործակցել տարածաշրջանի երկրների հետ՝ կայունությունը վերականգնելու նպատակով։