Հայրը իր 3-ամյա աղջկան 3 մլն դրամով վաճառել է 60-ամյա տղամարդու․ վերջինս փորձել է ծեծելով սպանել փոքրիկին

Պակիստանում ոստիկանությունը ձերբակալել է Աբդուլ Բաքիին՝ իր երեք տարեկան դստերը 60-ամյա տղամարդուն որպես հարսնացու վաճառելու մեղադրանքով։ 

Ըստ հրապարակման՝ Բաքին երեխային Սալահ Ուդինին փոխանցելու պայմանավորվածություն է ձեռք բերել, իսկ գործարքի արժեքը կազմել է 2,5 միլիոն պակիստանյան ռուփի՝ մոտ 3 մլն դրամ։ Սակայն, ըստ տեղեկությունների, տղամարդը այդ գումարը չի ստացել։

Բաքին ձերբակալվել է այն բանից հետո, երբ Բելուջիստան նահանգում ուժի մեջ է մտել մանկական ամուսնություններն արգելող օրենքը։ Past.am-ի փոխանցմամբ՝ իրավապահները պարզում են նաև գործարքի մյուս հանգամանքները։

Նշվում է, որ պայմանավորվածությունը ձեռք է բերվել տեղական «վալվար» կոչվող ավանդույթի շրջանակում, որի դեպքում որոշ համայնքներում փեսայի ընտանիքը գումար է վճարում հարսնացուի ընտանիքին ամուսնության համար։

Գործով առանձին դրվագ է դարձել Բաքիի ավագ դստեր մահը։ Աղջիկը, որի տարիքը մոտ 14-15 տարեկան էր, ամուսնացած էր Ուդինի 30-ամյա որդու՝ Քամրանի հետ։ Ըստ հաղորդագրությունների՝ երեք տարեկան երեխայի հետ կապված գործարքից մի քանի շաբաթ առաջ Քամրանը նրան ծեծի էր ենթարկել երկաթե ձողերով, ինչի հետևանքով աղջիկը մահացել էր։ Ոստիկանությունը այժմ ստուգում է՝ արդյոք այդ դեպքը որևէ կապ ունեցել է Բաքիի և Ուդինի միջև ձեռք բերված պայմանավորվածության հետ։

Բաքին, իր հերթին, հայտարարել է, որ Ուդինը ճնշում է գործադրել իր վրա՝ երկրորդ նման գործարքը կազմակերպելու համար։ Նրա խոսքով՝ տարեց տղամարդը սկզբում ցանկացել է ամուսնանալ Բաքիի ութամյա դստեր հետ, սակայն հայրը փոխարենը առաջարկել է իր երեք տարեկան երեխային։

Past.am-ի տեղեկություններով՝ դեպքի առնչությամբ իրավապահները շարունակում են քննությունը՝ պարզելու բոլոր ներգրավված անձանց գործողությունների հանգամանքները։