Ֆրանսիայի իշխանությունները հոկտեմբերի 19-ին Մարսելում արգելել են հավաքներն ու ցույցերը․ Maritima

ՄԻՋԱԶԳԱՅԻՆ 19 Հոկտեմբեր, 2026 17:08

Մարսելում տեղի ունեցած բողոքի ակցիաների ֆոնին Ֆրանսիայի իշխանությունները հոկտեմբերի 19-ին քաղաքում արգելել են հավաքների և ցույցերի անցկացումը, հայտնում է տարածաշրջանային Maritima պարբերականը։

«Պրեֆեկտի կարգադրության հիման վրա Բուշ-դյու-Ռոն դեպարտամենտի ոստիկանությունը պաշտոնապես արգելում է ցանկացած հավաքի և ցույցի անցկացումը Մարսել քաղաքի ողջ տարածքում այս երկուշաբթի՝ 2026 թվականի հոկտեմբերի 19-ին, ժամը 12:00-ից մինչև 20:00-ն»,— ասվում է հրապարակման մեջ։

Պարբերականը նշում է, որ որոշումն ընդունվել է «հոկտեմբերի 17-ի անկարգություններից հետո ստեղծված ծայրահեղ լարված իրավիճակի» պատճառով։

Շաբաթ օրը ամբողջ Ֆրանսիայում տեղի էին ունեցել կյանքի թանկացման և գնաճի դեմ ուղղված լայնամասշտաբ բողոքի ակցիաներ։ Դրանք ուղեկցվել էին ցուցարարների և ոստիկանության միջև թեժ բախումներով, անկարգություններով, ջարդարարությամբ ու վանդալիզմի դրսևորումներով։ Արմատական տրամադրված երիտասարդները կոտրել ու թալանել էին խանութներ, հրկիզել հասարակական տրանսպորտի կանգառներ և ավտոմեքենաներ։ Իրավախախտներին ցրելու նպատակով ոստիկանությունը կիրառել էր արցունքաբեր գազ, լուսաձայնային նռնակներ և ջրցան մեքենաներ։

Ֆրանսիական իշխանությունների տվյալներով՝ անկարգությունների ընթացքում ավելի քան երկու հազար մարդ է բերման ենթարկվել։

Բողոքի ցույցերի հետևանքով Ֆրանսիայի ներքին գործերի նախարար Լորան Նունյեսը հրաժարականի դիմում էր ներկայացրել։ Երկրի նախագահ Էմանուել Մակրոնն այն չէր ընդունել՝ չնայած ցույցերի ժամանակ ոստիկանության աշխատանքի հասցեին հնչող քննադատություններին։