Այսօր կկայանան «Արսենալ» -«Բարսելոնա» եւ «Յուվենտուս»- «Բավարիա» հանդիպումները

Չեմպիոնների լիգայի 1/8-րդ եզրափակիչում փետրվարի 23-ին Անգլիայի «Արսենալ»-ը կհյուրնկալի իսպանական «Բարսելոնա»-ին, իսկ իտալական «Յուվենտուս»-ը՝ սեփական հարկի տակ կընդունի գերմանական «Բավարիա»-ին:

«Արսենալ»- «Բարսելոնա» հանդիպ ման բացարձակ ֆավորիտը իսպանական թիմն է: Այս թիմը Չեմպիոնների լիգայի շրջանակում անցկացրած 6 խաղից որեւէ մեկում պարտություն չի կրել: 4 խաղ ավարտել է հաղթանակով, 2-ը՝ ոչ-ոքի արդյունքով: Այդ խաղերում թիմի ֆուտբոլիստները 15 գոլ են հեղինակել եւ բաց են թողել միայն 4 գոլ:

E ենթախմբում «Բարսելոնա»-ն բացարձակ առաջատար է 14 միավորով: Այս խմբի երկրորդ հորիզոնականում գտնվող «Ռոմա»-ն եւ «Բայերն»-ը 8 միավորով հետ են մնում «Բարսելոնա»-ից: 2016 թ. անցկացրած 15 խաղից 13-ը «Բարսելոնա»-ն ավարտել է հաղթանակով, 2-ը՝ ոչ ոքի արդյունքով: Առհասարակ, կատալոնական թիմը անպարտելիության ռեկորդ է սահմանել՝ չպարտվելով 32 խաղ անընդմեջ: Թիմը վերջին անգամ զիջել է 2015 հոկտեմբերի 3-ին «Սեվիլիա»-ին՝ պարտվելով 1:2 հաշվով: Հիշեցնենք նաեւ, որ իսպանական թիմը Չեմպիոնների լիգայի գործող գավաթակիրն է:

«Արսենալ»-ը 6 խաղից 3-ն ավարտել է հաղթանակով 3-ը՝ պարտությամբ: Խաղերի ընթացքում թիմը հակառակորդի դարպասը գրավել է 12 անգամ, բաց է թողել 10 գոլ: «Արսենալ»-ը 9 միավորով գտնվում է F ենթախմբի երկրորդ հորիզոնականում: Իր ենթախմբի առաջատար «Բավարիա»-ից հետ է 6 միավորով: 2016 թ. «Արսենալ»-ն անցկացրած 10 խաղերից 5-ում հաղթել է, 1-ում պարտվել է, 4-ն ավարտել է ոչ-ոքի:

«Յուվենտուս»-«Բավարիա» խաղում ֆավորիտը գերմանական թիմն է: F ենթախմբի առաջատարը Չեմպիոնների լիգայում վաստակել է 15 միավոր՝ 6 խաղից 5 –ում հաղթելով եւ միայն մեկ պարտություն իր հաշվին գրանցելով: Գերմանացիները հակառակորդի դարպասը գրավել են 19 անգամ եւ միայն 3 գոլ են բաց թողել: Թիմը 2016 թ. 7 խաղից 5-ն ավարտել է հաղթանակով, 1-ը՝ պարտությամբ:

«Յուվենտուս»-ը, սակայն, նույնպես բավական լավ մարզավիճակում է, այս տարի անցկացրած 11 խաղից միայն մեկն է ավարտել ոչ-ոքի արդյունքով: Բոլոր մյուս խաղերում իտալացիները հաղթանակ են տոնել: Չեմպիոնների լիգայում անցկացրած 6 խաղից 3-ում թիմը հաղթանակով է հեռացել խաղադաշտից: Մեկ անգամ պարտվել է, 2-ը՝ խաղացել ոչ-ոքի: Թիմը բաց է թողել 3 գոլ, 6 անգամ հասել հաջողության: Արդյունքում՝ D ենթախմբում «Յուվենտուս»-ը 11 միավորով զբաղեցնում է 2-րդ հորիզոնականը:

Հիշեցնենք, որ երկու հանդիպումներն էլ տեղի են ունենալու այսօր՝ փետրվարի 23-ին, ժամը 23:45-ին: