Զելենսկին առաջին անգամ համաձայնել է Ռուսաստանի պայմաններին

 

Ուկրաինայի նախագահ Վոլոդիմիր Զելենսկին հայտարարել է, որ խաղաղության հնարավոր համաձայնագրի շրջանակում կարող է քննարկվել նաև Ռուսաստանին անվտանգության երաշխիքներ տրամադրելու հարցը։ Այս մասին գրում է Financial Times-ը։

Զելենսկու խոսքով՝ արևմտյան երկրները կարող են անդրադառնալ Մոսկվայի անվտանգության պահանջներին, սակայն առաջնահերթ պետք է լուծվեն Ուկրաինայի անվտանգության ապահովման խնդիրները։

«Առաջին հերթին մենք պետք է լուծենք այս պատերազմի հարցը, և միայն դրանից հետո փնտրենք այն հարցերի պատասխանները, որոնք բարձրացնում է Ռուսաստանը՝ ելնելով անվտանգության նկատմամբ սեփական հայացքներից և ակնկալիքներից»,- հայտարարել է նա։

Ըստ հրապարակման՝ նոյեմբերի սկզբին Աբու Դաբիում նախատեսվում է Ուկրաինայի, Ռուսաստանի և ԱՄՆ-ի բանակցային խմբերի հանդիպում։ Քննարկումների օրակարգում կարող են լինել լարվածության նվազեցման միջոցառումները, էներգետիկ և ծովային ոլորտներում հրադադարի հնարավորությունը, ինչպես նաև Ուկրաինայի անվտանգության երաշխիքները։

Զելենսկին ընդգծել է, որ հետպատերազմյան անվտանգության համակարգի շուրջ բանակցություններին պետք է մասնակցի նաև Եվրոպան, եթե նախատեսվող երաշխիքները պահանջեն եվրոպական երկրների ներգրավվածություն։

Ուկրաինայի նախագահը նաև հայտնել է, որ Կիևը պատրաստ է քննարկել ռազմաճակատի գծի երկու կողմերում ապառազմականացված գոտի ստեղծելու ամերիկյան առաջարկը։ Միաժամանակ նա պնդել է, որ տարածքային հարցերը պետք է քննարկվեն բացառապես պետությունների ղեկավարների մակարդակով։

Անդրադառնալով Ռուսաստանի և ԱՄՆ-ի շփումների ակտիվացմանը՝ Զելենսկին մտահոգություն է հայտնել հնարավոր պայմանավորվածությունների առնչությամբ։ Նրա խոսքով՝ Ռուսաստանին անվտանգության երաշխիքներ տրամադրելը Մոսկվայի պատկերացմամբ կարող է ենթադրել Եվրոպայի և աշխարհի անվտանգության համակարգի փոփոխություն։

Past.am-ը շարունակում է հետևել ռուս-ուկրաինական պատերազմի շուրջ դիվանագիտական զարգացումներին։