Ռուսաստանը խստացնում է օտարերկրացիների արտաքսման կանոնները

Նոյեմբերից Ռուսաստանից օտարերկրյա քաղաքացիների վտարում նախատեսող Վարչական իրավախախտումների վերաբերյալ օրենսգրքի հոդվածների թիվը կավելանա ավելի քան երկու անգամ։ Թարմացված ցանկում կներառվեն ոստիկանության աշխատակիցների օրինական պահանջներին չենթարկվելը, հասարակական կարգի խախտումները և համացանցում մարդկային արժանապատվությունը նվաստացնող ու հասարակական բարոյականությունը վիրավորող նյութերի հրապարակումը։ Այս մասին իր Տելեգրամ ալիքում հայտնել է Պետական դումայի նախագահ Վյաչեսլավ Վոլոդինը։

 

Արտաքսման հիմք կարող են դառնալ նաև ռուսական զորքերի օգտագործումը վարկաբեկելուն ուղղված հրապարակային գործողությունները, Ռուսաստանի, նրա քաղաքացիների և ընկերությունների դեմ քաղաքական ու տնտեսական պատժամիջոցներ սահմանելու կամ երկարաձգելու կոչերը։ Բացի այդ, ցանկում կներառվեն սեռի, ռասայի, մաշկի գույնի, ազգության, լեզվի, տարիքի և կրոնի նկատմամբ վերաբերմունքի հատկանիշներով մարդկանց իրավունքների և օրինական շահերի խախտումները։

 

Վոլոդինը կարծում է, որ ցանկի ընդլայնումը կօգնի ամրապնդել հասարակական անվտանգությունը և կարգավորել միգրացիոն ոլորտը։ Նա ընդգծել է, որ Ռուսաստան ժամանող օտարերկրացիները պարտավոր են պահպանել երկրի օրենսդրությունը, տիրապետել ռուսերենին և հարգել նրա մշակութային ավանդույթները։

 

Նաև նոյեմբերին կսկսեն գործել մի շարք օրենքներ, որոնք կոչված են ապահովելու քաղաքացիների իրավունքների պաշտպանությունը։