Ուկրաինական ԱԹՍ–ները հարձակվել են Մոսկվային վառելիք մատակարարող նավթավերամշակման գործարանի և Ռյազանում Wildberries-ի պահեստի վրա

Նոյեմբերի 5-ի գիշերը ուկրաինական անօդաչու թռչող սարքերը զանգվածային հարձակում են իրականացրել Ռյազանի մարզի վրա։ «Բեկորների անկման հետևանքով վնասներ կան։ Ռյազանի արդյունաբերական օբյեկտների տարածքում հրդեհներ են բռնկվել։ Վնասվել են էլեկտրահաղորդման գծերը, քաղաքի մի հատվածում էլեկտրամատակարարման խափանումներ են նկատվում», — հայտնել է մարզի նահանգապետ Պավել Մալկովը։ Նրա տվյալներով՝ մեկ մարդ վիրավորվել է։ Ուկրաինական Exilenova+ և Supernova+ մոնիթորինգային ալիքները պարզել են, որ հարձակման թիրախներից մեկը եղել է Ռյազանի նավթավերամշակման գործարանը։ Ականատեսների լուսանկարների և տեսանյութերի համաձայն՝ հարվածներից հետո դրա տարածքում ուժեղ հրդեհ է բռնկվել։

Ռյազանի նավթավերամշակման գործարանը պատկանում է «Ռոսնեֆտին» և մտնում է Ռուսաստանի՝ ոլորտի երեք խոշորագույն ձեռնարկությունների շարքը։ Այն կարող է տարեկան վերամշակել ավելի քան 17 մլն տոննա նավթ։ Գործարանն արտադրում է ավտոմոբիլային բենզին, դիզելային վառելիք, ավիակերոսին, մազութ և բիտում։ Ձեռնարկությունը վառելիք է մատակարարում Մոսկվային և երկրի կենտրոնական շրջաններին։ Մինչ այդ գործարանը բազմիցս ենթարկվել է ուկրաինական հարձակումների։ Հոկտեմբերի 15-ին անօդաչուների հարձակումից հետո առաջնային վերամշակման կայանքներից մեկում հումքի վերամշակումը կասեցվել է։ Բացի նավթավերամշակման գործարանից, նոյեմբերի 5-ի գիշերը անօդաչուները հարվածել են Ռյազանում գտնվող Wildberries-ի լոգիստիկ կենտրոնին, գրում է Astra-ն։ Դա խոշոր բաշխիչ կենտրոն է՝ մոտ 173 հազար քառակուսի մետր մակերեսով։ Տեղի բնակիչները հայտնել են հարվածից հետո օբյեկտում բռնկված հրդեհի մասին։ Ավելի վաղ՝ օգոստոսի 29-ին, պահեստն արդեն ենթարկվել էր հարձակման և ժամանակավորապես դադարեցրել աշխատանքը։

Անցած գիշեր ուկրաինական անօդաչուները հարձակվել են նաև Ռոստովի մարզի վրա։ Մարզի նահանգապետ Յուրի Սլյուսարը հայտարարել է չորս շրջաններում շուրջ 50 անօդաչուի ոչնչացման մասին։ «Տուժածների և գետնի վրա ավերածությունների մասին տեղեկություններ չեն ստացվել։ Տվյալները կճշտվեն», — նշել է Սլյուսարը։ Բացի այդ, անօդաչուների հարվածի տակ է հայտնվել Վորոնեժը։ Վորոնեժի մարզի ղեկավար Ալեքսանդր Գուսևը հայտնել է 48 թռչող սարքի հայտնաբերման և ոչնչացման մասին։ «Նախնական տվյալներով՝ տուժածներ չկան։ Անօդաչու թռչող սարքերի բեկորների անկման հետևանքով արվարձանում վնասվել են առանձնատան ցանկապատերը և մի կիսակցորդ», — գրել է Գուսևը տելեգրամյան ալիքում։