Հանրապետականները սկսել են քննադատել Թրամփին և նրա քաղաքականությունը ընտրություններում պարտության համար

ԱՄՆ փոխնախագահ Վենսն արձագանքել է Հանրապետական կուսակցության ջախջախիչ պարտությանը միջանկյալ ընտրություններում՝ հայտարարելով, որ այդ ձախողման պատճառն Իրանի հետ պատերազմն է․ հայտնում է BBC-ին։

Ընտրությունների գիշերը Դոնալդ Թրամփը ևս ընդունել է, որ Իրանի հետ պատերազմը, որը նա սկսել էր փետրվարին, դեր է խաղացել հանրապետականների պարտության հարցում։

Հարցումների համաձայն՝ այս պատերազմը իսկապես ժողովրդականություն չի վայելում ամերիկյան հասարակության շրջանում, մասնավորապես այն պատճառով, որ այն հանգեցրել է բենզինի, դիզելային վառելիքի և այլ անհրաժեշտ ապրանքների գների բարձրացմանը։

Իր գրառման մեջ Ջ.Դ. Վենսը նաև թվարկել է պարտության այլ պատճառներ, այդ թվում՝ ԱՄՆ վարչակազմի հարաբերություններն Իսրայելի հետ։ Նա նաև արձագանքել է Թրամփի ներգաղթային քաղաքականության վերաբերյալ հանրային դժգոհությանը՝ գրելով, որ պատրաստ է քննարկել այդ քաղաքականության փոփոխությունները, մասնավորապես՝ ուշադրությունը կենտրոնացնելով անօրինական ներգաղթյալներ վարձող ընկերությունների վրա։

Ամերիկյան լրատվամիջոցները պնդում են, որ Վենսը ոգևորված չէ պատերազմով. նա նաև ակտիվորեն մասնակցել է Իրանի հետ բանակցություններին։ Այնուամենայնիվ, փոխնախագահը և նրա ներկայացուցիչները միշտ ընդգծել են, որ իրենց հրապարակային հայտարարություններում ձգտում են համապատասխանել նախագահի գծին։

Ջ.Դ. Վենսը համարվում է 2028 թվականի նախագահական ընտրությունների հավանական հանրապետական թեկնածուն։

BBC-ի հետ զրուցած որոշ քաղաքական գործիչներ և պաշտոնյաներ՝ անանուն կամ նույնիսկ բացահայտ, ուղղակիորեն Թրամփին անձամբ մեղադրել են պարտության համար։

«Սա նրա մեղքն է, ոչ թե ուրիշի։ Ընտրողները լիովին, լիովին մերժել են նախագահ Թրամփին։ Սա առաջին մասշտաբի աղետ է։ Ոչ ոք չէր սպասում դրան», – BBC-ի հետ զրույցում նշել է Տեխասում Հանրապետական կուսակցության լոբբիստ Բիլ Միլլերը։

«Սխալը սխալի հետևից», – բողոքել է Մինեսոտայում Հանրապետական կուսակցության քաղաքական խորհրդատու Գրեգ Պեպինը՝ խոսելով ընտրություններից առաջ Թրամփի վարքագծի մասին։

Ըստ Պեպինի՝ կուսակցությունը այժմ պետք է նոր ուղղություն ընտրի։
«Ես անկեղծորեն հույս ունեմ, որ մենք կշրջենք Թրամփի դարաշրջանի էջը, որ մենք կունենանք նոր խաղացողներ, նոր օրակարգեր և նոր ուղղվածություն՝ առաջ շարժվելու համար», – կարծում է քաղաքական խորհրդատուն։