ՀՅԴ-ն հրաշքներ չի խոստանում, բայց ցանկանում է արդարացնել լայն շերտերի ակնկալիքները

Հայաստանի իշխանության մաս դարձած Հայ Հեղափոխական Դաշնակցությունը հրաշքներ չի խոստանում, բայց վստահ են, որ կկարողանան առաջիկայում դրական արդյունքների ակնկալիք ու հույս առաջացնել  հասարակության լայն շերտերի շրջանում: ՀՀԿ-ՀՅԴ քաղաքական համագործակցության համաձայնագրի կնքումից հետո լրագրողների հետ ճեպազրույցում հայտարարց ՀՅԴ գերագույն մարմնի ներկայացուցիչ Աղվան Վարդանյանը: «Մենք համոզված ենք, որ այս համագործակցության շրջանակներում կարող են այնպիսի փոփոխությունների սկիզբ դնել, որ հասարակության հույսն ու անկնալիքն արդարացվեն»,-«Արմենպրես»-ի հաղորդմամբ` ասաց քաղաքական գործիչը` համոզված լինելով, սակայն, որ անխուսափելիորեն հասարակությունում լինելու է մի շերտ, որը մշտապես դժգոհելու է:

Աղվան Վարդանյանը վստահեցրեց, որ կուսակցության ներսում` հատկապես դրսի թևերի շրջանում, չկան տարաձայնություններ իշխանության մաս կազմելու որոշման կապակցությամբ: «Ճիշտ չեն այդ լուրերը: Դաշնակցությունը հսկայական կառույց է, մեր բոլոր որոշումներն ընդունվում են համախոհաբար: Ցանկացած հսկայական կառույցի, կուսակցության մեջ էլ կլինեն անհատներ` մեկ-երկու հոգի, ովքեր չեն կիսի, բայց սա տասներորդական խնդիր է: Դաշնակցությունը խորապես համոզված է, որ մեր երկրի առջև կանգնած խնդիրները լուծելու, մեր հասարակության վստահության մակարդակը բարձրացնելու տեսակետից սա ուղղակի ժամանակին կատարված ու ճշգրիտ քայլ է»,-ընդգծեց Վարդանյանը:

Հայաստանի Հանրապետական կուսակցության նախագահի տեղակալ Արմեն Աշոտյանն էլ նկատեց, որ վերջին 4 տարվա ընթացքում Հայաստանի քաղաքական դաշտում օրինաչափ դարձած տրոհման գործընթացը կոտրելու են այս համագործակցությամբ: «2012-ից առ այսօր թե իշխանական, թե ընդդիմադիր ձևաչափերը տրոհվել են. տրոհվել է ՀԱԿ դաշինքը, 2012-ի խորհրդարանական կոալիցիան, տրոհվել է Ազատ դեմոկրատներ-«Ժառանգություն» միասնությունը: Մենք ստեղծում ենք նոր փոփոխություններ, մենք ասում ենք, որ քաղաքական դաշտում հնարավոր է ու պետք է լինի համախմբում, համատեղ աշխատանք: Տրոհ ման գործընթացը պետք է թողնենք անցյալում»,-ասաց Արմեն Աշոտյանը:

ՀՀ Նախագահի նստավայրում փետրվարի 24-ին Հայաստանի Հանրապետական կուսակցության և Հայ Հեղափոխական Դաշնակցություն կուսակցության միջև կնքվել է Քաղաքական համագործակցության համաձայնագիր: Հայաստանի Հանրապետական կուսակցության կողմից այն ստորագրել է ՀՀԿ նախագահի տեղակալ Արմեն Աշոտյանը, Հայ Հեղափոխական Դաշնակցության կողմից՝ ՀՅԴ Հայաստանի Գերագույն մարմնի ներկայացուցիչ ԱղվանՎարդանյանը: Ինչպես կողմներն են նշում դրանով հիմք է դրվում երկարատև համագործակցության: